Joe Biden w kùńcowëch tidzeniach swòji prezydenturë ju czile razy dôł sã na ùżëcé prawa łasczi dlô skôzónëch sôdzewëch. Tim razã òbjãło òno mòrdarzów skôzónëch na smierc.
W pòniedzôłk 23. gòdnika prezydent Zjednónëch Stanów Joe Biden ògłosył, że brëkùjącë prezydencczégò prawa łasczi zamienił sztrôfã smiercë na dosmiertną sôdzã dlô 37 ze 40 skôzónëch na niã na federalny rówiznie. Wëroczi òstałë niezmienioné dlô sprôwców trzech apartnëch ataków na wëdarzenia spòrtowé a religiowé. Ti, chtërnëch òbjął prezydencczi akt łasczi, nie mdą mielë szansë na chùtszé zwòlnienié.
– Jô pòtãpióm tëch mòrdarzów, òpłakiwóm òfiarë jich bestialsczich czënów i bòlejã razã z rodzëznama, jaczé wëcerpiałë tã stratã nié do wëòbrażeniô i nié do wënôdgrodzeniô. Czerowóny równak sëmienim a téż doswiôdczenim jakno òbróńca z ùrzãdu, nôleżnik Sądowny Kòmisje Senatu, wiceprezydent a terô prezydent, jem gwës barżi jak czedëlebądz przódë, że mùszimë skùńczëc z brëkòwanim sztrôfë smiercë na federalny rówiznie – tłómacził swòjã decyzjã Biden.
Wedle reglów administracjô nowégò prezydenta, na jaczégò òstôł wëbróny pòpiérający sztrôfã smiercë Donald Trump, nie bãdze mògła copnąc aktów łasczi wëdónëch przez Bidena.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie