Òd 2026 USA chce rozstawiac w Niemiecczi rakétë daleczégò sëgù. Ruskô mòże òdpòwiedzec szlachòwnyma dzejaniama. Tak mòże stracëc mòc traktat z 1987 r. ò niebrëkòwanim taczi barnie.
W wëdowiedzach z òrãdzë kùńca rokù rusczi Minister Bùtnowëch Sprôw Sergej Ławrow pòwtôrzô stanowiszcze Rusczi Federacje co do dalszégò słëchaniô mòratorium, jaczé òbòwiązywało Zjednóné Stanë i Sowiecką Zrzesz òd 1987 rokù. Chòdzy ò „Traktat ò likwidacje rakétowëch patrónów strzédnégò i krótczégò sëgù”, w jaczim te dwa państwa ùgôdałë sã, że nie mdą produkòwałë ani wëzwëskiwałë lądowëch rakétów i manewrëjącëch patrónów ò sëgù òd 500 do 5500 km. W 2019 za rządów Donalda Trumpa USA wëcopało sã z ùgôdënkù, cwierdzącë że przódë złómała gò Ruskô, jakô erbùje midzënôrodné traktatë pò ZSSR. Ławrow przekazywô, że Kreml negatiwno zdrzi na planë rozstôwianiô patrónów daleczégò sëgù w Niemcach przez Stanë òd 2026 rokù. Mają òne bëc zagrôżbą dlô wôżnëch pùnktów w Rusce, do jaczich patrónë mdą mògłë dolecec w 10 minut. Ławrow zapòwiôdô, że Mòskwa w kùńcu téż sã wëcopie z mòratorium. Pòdczorchiwô równak, że dzysdnia òno wcyg je w mòcë i Ruskô bãdze gò ùchòwiwa.
Twoje zdanie jest ważne jednak nie może ranić innych osób lub grup.
Komentarze opinie