11. gòdnika w całi Pòlsce niechtërne szkòłe pòdostôwałë falszewé wiadë ò bómbach schòwónëch w rubzakach ùczniów. Służbë w Bëtowie, Gdinie czë Słëpskù téż stanãłë w pòszëkù.
We strzodã 11. gòdnika przed pôłnim ògniowô starżô i pòlicjô rëgnãłë do Òglowòsztôłcącégò Liceùm w Bëtowie. Wëszëznë szkòłë òstałë mailowò wiédzã ò bómbie zatacony w rubzakù jednégò z ùczniów. Szkòlôcë i robòtnicë òstelë ewakùòwóny do bùrsë niedalek szkòłë, a òb czile gòdzyn sznëkrowaniô za wëbùchòwim ladënkã zamkłi béł dzélëk sz. Gduńsczi, przë jaczi stoji szkòła. Kùńc kùńców służbë nie nalazłë ladënkù i ùznałë alarm za falszewi.
To sã òkazéwô, że szlachòwné alarmë tikałë sã nié blós Bëtowa. Na Pòmòrzu jistną wiadã ò bómbie dostôł m.jin. gdińsczi „Cosinus” a téż V Òglowòsztôłcącé Liceùm w Słëpskù. Z wiadłów z jinëch strón wëchôdô, że w ten sóm dzéń òfiarą falszewëch alarmów padłë szkòłë w całi Pòlsce, m.jin. w Poznaniu, w Ełkù, w Biôłimstokù, Łodzë. Niżódna bómba nigdze nie bëła pòdłożonô. Terô służbë bãdą zajimałë sã szukanim za sprôwcama ti òglowòkrajewi desztabilizëjący akcje.
H.S.Sz
Twoje zdanie jest ważne jednak nie może ranić innych osób lub grup.
Komentarze opinie