Reklama

Łãkòwnik-satanista òstrzélôł prezydencczi pałac

Klëka

16/10/2025 10:09

Prezydent Kenie William Ruto. Aùtór: Magiondolo; zdrzódło: https://pl.wikipedia.org/wiki/William_Ruto#/media/Plik:William_Samoei_Ruto.jpg

Pòd rezydencją głowë państwa w Nairobi zdżinął szandara ùstrzelony w serce. Atakòwnik cwierdzył, że wësłôł gò Szatan.

W pòniedzôłk trzënôstégò rujana w Nairobi, stolëcë Kenie, kòl prezydencczégò pałacu przechôdôł chłop przezeblokłi za bezdomôcégò. Trocził ze sobą miech. Zaczął jic w czerënkù szandarów, jaczi wachtowelë kòl brómów do rezydencje. Jãlë krzikac w jegò czerënkù, żebë gò òdnëkac. Òn pòżdôł tedë, jaż dwùch mùńdurowëch òprzestónie na niegò baczëc, czej sprôwdzelë aùtół, jaczi miôł przejachac przez brómã. Wnym z miecha wëjął łãk a strzéle i ùstrzelił jednégò z szandarów. Cãżkò reniony w lewé płëco i serce Ramadhan Mattanka w bòlëcë òstôł ùznóny miartwim. Jiny szandarzë ùskrzënilë i zatrzimelë łãkòwnika. Piãcdzesąt szesc lat stôri Kithuka Kimùnyi na przesłëchach scwierdzył, że je pòsélcã Szatana. Atakòwnik òstónie pòddóny psychiatricznym badérowanióm, a pòdszukòwny próbùją wëdowiedzëc sã jegò mòtiwù. Òb czas atakù prezydent Kenie William Ruto béł w pałacu i rëchtowôł sã do wëjazdu. Nie je wiedzec, czë mógł bëc tim przédnym célã łãkòwnika.

H.S.Sz.

Załączniki