Reklama

Lëtwinowie rozbilë przesprôwczą grëpã dzejającą na pòlét Rusczi

Klëka

18/09/2025 21:56

Rôtëszowi Plac we Wilnie. https://pl.wikipedia.org/wiki/Wilno#/media/Plik:Vilnius_(Wilno)_-_city_hall_square_(Rotu%C5%A1%C4%97s_aik%C5%A1t%C4%97).JPG

Wcyg dérëje szëkba za trzema nôleżnikama grëpë, jaczi òkróm wëséłaniô wëbùchowëch pòdëszków są winowóny téż ò pòdpôlenié wiôldżégò krómù w Wilnie.

Lëtewsczé służbë dałë do wiadë, że ùdało sã rozbic przesprôwczé karno, jaczé przërëchtowało sztërë terroristiczné ataczi w krajach Eùropë. W òbrëmim wëdowiédzë bëło przeprowadzoné trzëdzescë kòntrolów pò dodomach na Lëtwie, Łotwie, w Pòlsce i Estonie. Zatrzimóny òstelë òbëwatelë Lëtwë, Rusczi, Łotwë, Estonie i Ùkrajinë, chtërny wedle pòdszukòwnëch bëlë w łączbie z rusczima specjalnyma służbama. Òbwinë òstałë pòstawioné piãtnôsce lëdzóm. Łoni w lëpińcu grëpa wësłała z Wilna sztërë przesëłczi z samòrobòtnyma wëbùchòwima ladënkama ùkrëtima w pòdëszkach do masażu i òdpaliwónëch z ùżëcym elektronicznégò zégra. Pierszi ladënk béł zdetonowóny na latawiszczu w Lipskù zarô przed zaladowanim na fliger, co miôł lecec do Wiôldżi Britanie. Drëdżi paczét wëbùchł w Pòlsce òb czas transpòrtu aùtołã jedny z kùriersczich firmów. Trzecy eksplodowôł w magazynie w Birmingham. Czwiôrti miôł téż wëbùchnąc w Pòlsce òb czas transpòrtu, ale mechanizm sã zepsuł. Z przesprôwczi grëpë na wòlë òstôwają trzeji nôleżnicë, za jaczima òstałë wëstawioné scëgòwné lëstë: Andriej Babùrow, òbëwatel Rusczi, Tomas Dovgan Stabacinkas, òbëwatel Rusczi ë Lëtwë, a téż Danił Gromòw, òbëwatel Ùkrajinë. Ti mielë téż czerowac akcją pòdpôleniô krómù Ikea w Wilnie łoni w maju.

Załączniki