Reklama

Łukaszenka nie dowiérzô Pùtinowi?

Klëka

23/10/2024 08:30

Na zetkanim z pòlarnyma badérama i ùczałima prezydent Biôłorusczi gôdôł ò brëkòwnoce ùdzélu Biôłorusczi w mirnëch negòcjacjach pò wòjnie na Ùkrajinie.

W czwiôrtk 17. rujana w Prezydencczim Pałacu w Mińskù bëło zéńdzenié prezydenta Biôłorusczi Aleksandra Łukaszenczi z biôłorusczima ùczałima i badérama, jaczi brelë ùdzél w pòlarnëch ekspedicjach tegò kraju w Antarktice. Wedle kòmùnikatu pòdónégò na òficjalny internetowy starnie prezydenta Repùbliczi Biôłorusczi, témą kôrbiónczi bëło òbgôdanié dotëchczasnëch zwënégów ju przeprowadzonëch misjów i brëkòwnota chùtczégò a maklewnégò zwëskù z badérowaniów, jaczé z pòzdrzatkù na ògrańczoné financowé spòsobnoscë repùbliczi ni mògą dérac tak długò jak w przëtrôfkù taczich krajów jak Zjednóné Stanë czë Ruskô.

Bôczënk wôrt równak dac téż na nieòficjalné wëpòwiescë prezydenta, jaczich zamkłosc òstała zaregistrowónô na nagraniach z zetkania ùprzëstãpnionëch w Internece.

Reklama

W rozmòwie z badérama Łukaszenka nawlekôł do dzysdniowi geòpoliticzny stojiznë kraju, òsoblëwie do mòżebnëch skùtków wòjnë midzë Ruską a Ùkrajiną. Biôłorusczi wódca scwierdzył, że przedstôwcowie Biôłorusczi mùszą bëc przë mirnëch negòcjacjach, żebë zagwësnic teritorialną integralnotã repùbliczi. „Mògą pòdjic taczé decyzje, że witro pòłowã kraju bãdze nót òddac” – gôdôł Łukaszenka. Dali pòdsztrichiwôł swòjã rólã jakno nieùdżibłégò wódcë niewiódnégò dlô państwów Zôpadu.

H.S.Sz.

Czytaj nas w Google

Dodaj do Google

Źródło i opracowanie własne