Reklama

Madżarzë zatrzimelë ùkrajińsczi kònwój

Klëka

07/03/2026 17:08

V. Orban. Òdj. © European Union, 1998–2026; zdrzódło: https://pl.wikipedia.org/wiki/Viktor_Orb%C3%A1n#/media/Plik:Viktor_Orban.2024_(cropped).jpg

Dzejania antiterroristów Ùkrajina pòzwała ùprowadzenim i kradélstwã. Madżarskô żądô wëwidnieniów w sprawie kònwòju.

W piątk sódmégò strëmiannika madżarsczi rząd ùprzistãpnił nagrania z zatrzimaniô ùkrajińsczégò kònwòju we czwiôrtk. Antiterroriscë przëdulczëlë na tanksztelë, na jaką przëjachałë cãżarowé aùtołë. Zatrzimelë lëdzy bënë, skùlë jich kłódkama i przesznëkrowelë wòzë. Robòtnicë i òchróniarze ùkrajińsczégò państwòwégò bankù Òszczadbank bëlë òbwinowóny ò pranié brëdnëch dëtków. Wòzë i pieniądze, jaczé w nich wiezlë, òstałë skònfiskòwóné. Sétmë kònwòjentów ùsadzëlë w Bùdapeszce, ale pò interwencje ùkrajińsczich kònsulów òstelë wëpùszczony ë ju są na Ùkrajinie. Ministerstwò Bùtnowëch Sprôw Ùkrajinë wëdało kòmùnikat, w jaczim pòwiedzelë, że madżarsczé służbë ni miałë niżódnégò spòdlégò do zatrzimaniô kònwòju jadącégò z Aùstrie.  Béł na regùlarnym turze, z zaregistrowónym wedle wszëtczich przepisów ladënkã sztërdzescë miliónów dolarów, trzëdzescë piãc miliónów eùro i dzewiãc kilogramów złota. Ministerstwò doradzëło téż Ùkrajińcóm ùnikac wëjazdów na Madżarskã i przejazdów przez niã w związkù z ùprowadzenim sétmë òbëwatelów i kradélstwã miectwa bankù. Ministerstwò Bùtnowëch Sprôw Madżarsczi òswiôdczëło za to, że bãdze sã domagac òd Ùkrajinë wëwidnieniów co do przejazdu, a kònkretno, czë dëtczi bëłë wëzwëskóné na jaczis ôrt abò na czijs zwësk w Madżarsce.

H.S.Sz.

Źródło i opracowanie własne