Marsz „frãcuzów” na indijsczi parlament

Satiricznô partiô zwëskiwô na jawernym znaczenim i mòże bëc nôwikszim wëzwanim dlô rządów premiérë Mòndégò – tak taksëje agencjô Reutera.

Latos w maju przédnik Nôwëższégò Sądu Indie Surya Kant w pùbliczny wëpòwiescë rzekł ò bezrobòtnëch młodëch, że są frãcuzama i parazytama. Te słowa sprawiłë pògòrchã w kraju i doprowadzëłë do pòwstaniô Lëdowi Partie Frãcuzów – satiriczny rësznotë, nimò pòzwë niezaregistrowóny jakno pòliticznô partiô. Rësznota przëjimô nôleżników online i szérzwi swiądã ò jiwrach młodëch lëdzy, midzë jinszima z nalézenim robòtë na niedrësznym rënkù. Òd czedë równak òkôzało sã, że pò jednym wëcékù egzaminacjowëch arkùszów ministerstwò edukacje ùniewôżniło wstãpny egzamin na mediczné sztudia, Lëdowô Partiô Frãcuzów zaczãła prosto sprocëmniwac sã rządowi. Ji nôleżnice domôgelë sã copniãcô decyzje ò ùniewôżnienim egzaminu i wëpłatë òdszkòdowaniô dzesãc miliónów rupiów (równoznaczëna trzësta dzewiãcdzesąt trzech tësący złotëch) dlô familiów czilenôsce kandidatów na sztudia, jaczi pò decyzje ministerstwa sã zabilë. Pòd kùńc czerwińca niechtërny z dzejarzów pòdjimnãlë głodowi strajk dlô pòpiarcô protestów. W pòniedzôłk dwadzestégò lëpińca òdemklë nową sesjã indijsczégò parlamentu, a Lëdowô Partiô Frãcuzów zadecydowała ò marszu na parlament z żądaniama dimisje ministra edukacje Dharmendrë Pradhana, ùstąpieniô premiérë Narendrë Mòdégò i refòrmë egzaminacjowi systémë. Protest cwiardo zdëszëlë szandarzë z ùżëcym lónów i łizawiącégò gazu. Pòlicjô pòdôwô, że pòszkòdowónëch bëło szescdzesąt demònstrantów, a òrganizatorzë, że do bòlëców trafiło jich półtorasta. Na drëdżi dzéń zòrganizowelë pòstãpné demònstracje w czile indijsczich gardach. Jedna bëła pòd dodomã premiérë Mòdégò. Tam doparłãczëlë do nich przédnicë Nôrodnégò Kòngresu, nôwikszi òpòzycjowi partie w Indiach, Rahul i Priyanka Gandhi. Pòlicjô jich zatrzimała i wëpùscëła pòd wieczór. W ten sóm dzéń w parlamence òpòzycjowé partie zażądałë debatë nad dzejaniama pòlicje. Rësznota „frãcuzów” zapòwiôdô dalszé protestë. Premiéra Narendra Mòdi jesz nie wëdôł w sprawie niżódnégò ògłosu.

H.S.Sz.