Izraelsczé lëftowé sëłë zaatakòwałë òbiektë namienioné rozwijowi atomòwi barnie dlô Iranu. Iran ùznôł to za wëpòwiedzenié wòjnë.
W piątk trzënôstégò czerwińca reno izraelsczé wòjskò dokònało ùrëchliwającégò atakù na Iran. Wòjskòwô latawizna wëpùscëła patrónë i fligrë, jaczich célã béł zakłôd ùbòkadniwaniô ùranu w Natanz i jinszé òbiektë sparłãczoné z rozwijã irańsczi atomòwi barnie. Rakétë pòspadiwałë téż na cywilné bùdinczi. W sëmie zdżinãło sétmëdzesąt òsmë òsób, w tim szef sztabu irańsczégò wòjska Mohammad Bagheri a téż wódca Kòrpùsu Starżników Islamsczi Rewòlucje Hossein Salami, a trzësta dwadzesce dzewiãc òsób bëło renionëch. Równoczasno z lëftowima sëłama swòjã sabòtażową akcjã w głãbie Iranu przeprowadzył téż Mòsad, jaczégò zadanim bëło ùszkòdzëc rakétowé stanowiszcza Iranu i ùnimòżebnic òdpòwiedz jegò lëftowi òbarnë. Nôwëższi wódca Iranu Ali Chamenei zapòwiedzôł pòmstã na Izraelu. Ò wespółùdzél w atakù bëlë òbwinowóny téż Amerikanie, le ti przékùją swòjémù direktnémù wspiarcémù, a zapòwiôdają blós zagwësniwanié bezpiekù gwôsnym żôłnérzóm na Blësczim Wschòdze. Zaczãła sã ju irańskô òdpòwiesc – ùszkòdzónô òsta midzë jinszima sedzba izraelsczégò ministerstwa òbarnë w Tel Awiwie. Izrael pòzamikôł wszëtczé ambasadë i kònsulatë na całim swiece, a swòjich òbëwatelów przestrzégł przed pòkazéwanim żëdowsczich ë izraelsczich symbòlów w pùblicznëch placach.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie