Reklama

Miałë bëc Chònice, bãdze Krôjna

Klëka

13/11/2025 11:52

Òdj. z facebookòwi starnë rancza "Przytulna Zagroda"

Ranczo w Ògòrzelënach scygało Chòniczanów do òbzéraniô gbùrsczich zwierzãt, jaczé pòznac mielë leżnosc òb czas żëwëch szopków na rënkù. Miast przeniesc sã blëżi nich, wëcygnie bùten wòjewództwa.

Òd zélnika miéwcë rancza ze zwierzãtama „Przytulna Zagroda”, jaczé dzejało w Ògòrzelënach na Kòsznédrach, òbgadiwało z bùrméstrã Chòniców Arseniuszã Finsterã mòżebnosc przenieseniô dzejaniô rancza do gardu. Za wëbòrã Chòniców stojało midzë jinszima to, że przez dwa lata swòjégò dzejaniô zwierzãta z rancza bëłë bróné do żëwëch szopków na Gòdë na miesczim rënkù w Chònicach, tak tej mieszkańcë ju dobrze znelë ògòrzelińską atrakcjã, w przédny rédze przëcygającą dzecy. Bùrméster miôł zabédowóné miéwcóm teren tak pòzwóny Cziskùlë, zelony òbéńdë midzë Miesczim Lôskã a Lasową szasëją. Tam przëniesc miałobë sã kòl dwasta piãcdzesąt sztëk rozmajitëch gbùrsczich zwierzãt, a miéwcë rancza bë przëcyglë razã z nima. Pò kònsultacjach z radzëzną dzélnicë i òdrzekù mieszkańców bùrméster ògłosył, że ùdba sã nie zjiscy – szło przede wszëtczim ò zbòjania ò kòmfòrt ze starnë mieszkańców, a to przez pôchë i zwãczi, chtërne bë sprôwiałë zwierzãta. Wëcmanizna prowadzącô ranczo dała do wiadë, że nową sedzbą bãdze gmina Kamiéń Krajeńsczi.

H.S.Sz.