Reklama

Mieszkańcë rzeklë swòje, wësłëchają jesz socjologa

Klëka

24/01/2026 11:21

Òdj. Gdaniec; zdrzódło: https://pl.wikipedia.org/wiki/Sierakowice_(gmina)#/media/Plik:Sr%C3%B4k%C3%B2jce_-_urzad_gminy.JPG

Wëniczi ankétów jasno pòkazéwają, że mieszkańcë gminë Serakòjce nie chcą bëc mieskò-wieską gminą. Wójt Kùczkòwsczi nie kùńczi równak z tą témą.

W gminie Serakòjce skùńczëłë sã slédné, dwanôsté spòlëznowé kònsultacje w sprawie nadaniô Serakòjcóm miesczich prôw. Wszëtczé wëniczi dotądka wskazéwałë, że mieszkańcë są procëm ti ùdbie. I tą razą nie bëło jinaczi. W ankétach mieszkańcë z szôłtëstwa Mrozë delë trzënôsce głosów „za” i szescdzesąt piãc procëm, a z Serakòwsczi Hëtë „za” welowało dwùch, a „procëm” sztërdzescë. Chòc wedle wczasniészich zapòwiesców wójta gminë Serakòjce Mirosława Kùczkòwsczégò terô proces miôłbë sã skùńczëc, wójt zapòwiedzôł pòstãpné kroczi. Rzekł, że gôdôł z jednym socjologã, jaczi zajimie sã zbiéranim dokùmentacje w sprawie nadaniô Serakòjcóm miesczich prôw, i że zapłaconé za to bãdze z gminny bùdżetowi rezerwë. Samòrządôrz scwierdzył, że takô robòta je brëkòwnô, żebë mieszkańcë mielë gwësnosc, czë nie welowelë na próżno. Pitóny ò to, dlôcze taczich badérowaniów nie bëło przed zaczãcym spòlëznowëch kònsultacjów, wójt rzekł, że ni ma taczégò prawnégò mùszu, a przeprowadzenié badérowaniów pò kònsultacjach je òriginalną i przemëslóną ùdbą gminë Serakòjce.

H.S.Sz.

Załączniki