Reklama

Młodi Niemcë trëją sã gazã

Klëka

01/09/2025 09:42

Tlenk ditãchnia (N₂O). Aùtór: Ben Mills; zdrzódło: https://pl.wikipedia.org/wiki/Tlenek_diazotu#/media/Plik:Nitrous-oxide-dimensions-3D-balls.png

Wedle lékarzów same zôkazë planowóné przez federalny rząd nick nie dadzą, jeżlë nie rëgnie infòrmacjowô kampaniô ò zagrôżbach rzeszącëch sã z rozwieseliwającym gazã.

Z rapòrtów z niemiecczich bòlëców i òstrzódków zdrowiô wëchôdô, że w dwa tësące dwadzestim czwiôrtim rokù lëczba zatrëców rozwieseliwającym gazã ùrosła dwa razë w przëmierzenim do ùprzédnégò rokù. Taczé statisticzi zanotérowóné òstałë w Berlënie, Brandenbùrsce, Badenie-Wirtembersce, Meklembùrsce–Przédnym Pòmòrzim, Sasach, Sasach-Anhalce i Turingie. Przëtrôfczi zatrëcô roscą téż latos. Tlenk ditãchnia (N₂O) je tam wëzwëskiwóny jakno pòpùlarnô ùżiwka na imprezach nôscelôtków i młodëch dozdrzëniałëch z pòzdrzatkù na jegò eùfòriczné dzejanié, ale jegò brëkòwnicë czãsto nie wiedzą, że òn mòże miec stójny negatiwny cësk na jich nérwòwi ùstôw i prowadzëc midzë jinszima do paraluszu mùsklów. Do niebezpiecznëch przëtrôfków dochôdô téż zarô pò przëjimniãcym dôwczi gazu, czej ùtrzëmiwają sã zamącenia swiądë – w lëpińcu we Frankfùrce nad Menã czerowca pòd cëskã rozwieseliwającégò gazu wjachôł aùtołã w grëpã òsób jadącëch na elektricznëch kùlôkach, przez co dwaji chłopi zdżinãlë. Niemiecczi znajarze cwierdzą, że rapòrtë i tak mògą nie dawac rzetelny wiadë ò jiwrze rzeszącym sã z tlenkã ditãchnia, bò felëje statistików wskazéwającëch na fakticzné jegò ùżëcé strzód dzecy i młodzëznë – je òn pòwszechno przistãpny w titoniowëch krómach, gdze przedôwô gò sã w biksach, jaczima sã nafùlowiwô balonë. Niechtërne landë i jinszé samòrządë wprowadzëłë ògrańczenia przedażë rozwieseliwającégò gazu. Federalny rząd planëje ùsadzëc wprowadzenié generalnégò zôkazu jegò przedôwaniô dlô nieùstnëch.

H.S.Sz.

Czytaj nas w Google

Dodaj do Google

Źródło i opracowanie własne