Reklama
Mount Everest zasëpóny smiecama
30/12/2025 10:26
Pòbiérónô dotądka kaùcjô nie zdzejała tegò, co bëło ùmësloné. Miast ni Nepal wprowôdzô bezzwrotną òpłatã ò ti sami sëmie.
Nepalsczé wëszëznë wëcopiwają sã ze smiecowi òpłatë pòbiéróny òd wchôdającëch na Mount Everest. Wprowadzëlë jã jednôsce lat nazôd. Wspinacze mielë płacëc przë wlézenim równoznaczënã sztërë tësące dolarów, a mòglë jã dostac nazôd, jeżlë schôdającë z górë zabierzą ze sobą co nômni òsmë kilogramów smiecy. Miało to pòmòc w niekòntrolowónym zasëpiwanim górë wszelejaczima òdpadama. Òkôzało sã równak, że òpłata nié za wiele pòmôgała. Do pùnktów òdbiéru smiecy trafiałë przede wszëtczim te z niższich partów Mount Everestu, skąd nôlżi je zabrac. Nôbarżi zasmieconé są równak te wëższé partë, skąd przez drãdżé warënczi himalajiscë wrôcają leno z krziseniowima bùdlama. Do tegò limit òsmë kilogramów nie òdpòwiôdôł statistikóm, wedle jaczich strzédno wspinôcz przez szesc tidzeni przebëtëch na górze produkòwôł dwanôsce kilogramów smiecy. Felowało téż kòntrolë nad tim, co wspinacze pò prôwdze robią wëżi slédnégò kòntrolnégò pùnktu pòd lodówcã Khumbù. Na wniósczi lokalny spòlëznë wprowadzonô mô bëc jinszô òpłata. Płacëc jã bãdze kòżdi wspinôcz, bãdze to téż sztërë tësące dolarów, ale nie bãdze zwrotnô. Dëtczi bãdą wëdóné na ùsadzenié jesz jednégò kòntrolnégò pùnktu wëżi Khumbù, a téż na wënajãcé starżników, jaczi bãdą dozerac w slédnym parce drodżi, czë himalajiscë zabiérają òdpadë ze sobą. Projekt ùstawù w ti sprawie mùszi przëjic nepalsczi parlament. Mô to bëc part piãclatnégò planu generalnégò òczëszczaniô nôwëższi górë swiata.
H.S.Sz.
Reklama
Komentarze opinie
Podziel się swoją opinią
Twoje zdanie jest ważne jednak nie może ranić innych osób lub grup.
Reklama
Wideo
Reklama
Komentarze