Anestozjolog òstôł skôzóny na dosmiertną sôdzã za zabicé białczi i córczi. Nie chcôł dopùscëc do rozdënkù.
W drëdżim procesu Nôwëższi Sąd Hongkòngù we wtórk 14. séwnika skôzôł anestozjologa i ùniwersytecczégò profesora z Malezje Khaw Kim Suna na dosmiertną sôdzã za zabicé swòji białczi i córczi w 2015 rokù. Ten sóm wërok miôł czëté w 2018, le tedë jegò òbrónie ùdało sã doprowadzëc do jesz jednégò procesu. Nôrzãdłã mòrdarstwa bëła bala do jodżi. W maju 2015 Wong Siew Fing, białka skôzónégò, òstała nalazłô razã z 16-latną córką nieprzëtomnô w aùtole. Pò zabranim do bòlëcë òkôzało sã, że òbie ùmarłë przez zatrëcé tlenkã wãgla, tj. czadzã. Szandarzë przeszukelë aùtół i nalezlë w bagażnikù pùstą balã do jodżi. Pòdezdrzenia padłë na anestozjologa, jaczi krótkò przed mòrdarstwã béł skãtrzony z jedną sztudérką. Mógł chcec zabic białkã, żebë nie doszło do rozdënkù i pòdzélënkù majątkù. Òbróna tłómaczëła, że òbskôrżony miôł przewiozłé dodóm dwie bale nafùlowóné czadzã, żebë zabic nima szurë, a białka wiedzała ò romansu chłopa i mù na to pòzwòlała, ale sąd nie dôł temù wiarë. Nie nalazłë sã téż niżódne wskôzë na to, żebë jegò białka i córka chcałë sã zabic same. Mòrdôrz nie złożił wnióskù ò zmniészenié sztrôfë.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie