Reklama

Mòrsczi Ùrząd w Słëpskù wrócy pò szesc latach

Klëka

03/03/2026 10:16

Bùdink dôwnégò Mòrsczégò Ùrzãdu w Słëpskù. Òdj. Nemo5576; zdrzódło: https://pl.wikipedia.org/wiki/Urz%C4%85d_Morski_w_S%C5%82upsku#/media/Plik:S%C5%82upsk_Sienkiewicza_18_DSC_1737.jpg

Wëgaszenié ùrzãdu i òddanié jegò òbéńdë pòd dozér Szczecëna i Gdinie w dwa tësące dwadzestim béł partã òglowi refòrmë mòrsczi administracje w Pòlsce.

Minister infrastrukturë wëznacził człowieka, co mô sã zajic reaktiwacją Mòrsczégò Ùrzãdu we Słëpskù, wëgaszonégò szesc lat nazôd. To Tomôsz Bòbin, dôwny direktór słëpsczégò Mòrsczégò Ùrzãdu, a dzysdnia sekretéra gardu Darłowa. Dostôł zadanié òrganizacje lëdzy, prawnégò spòdlégò i przërëchtowaniô dokùmentów brëkòwnëch do ùrësznieniô ùrzãdu. Do dogôdaniô z ministrã są midzë jinszima grańce pòddóny mù òbéńdë. Mòże bëc przëjãti dôwny syg òd Dwirzëna w gminie Kòlbrzég jaż do Łebë, co bë dôwało sto sétmëdzesąt kilométrów sztrądu. Do rozwôżeniô są téż zjinaczi z ùjimniãcym rozwiju mòrsczi wiatrowi energeticzi. Òbsada nowégò ùrzãdu mòże bëc scygnionô z ùrzãdów we Szczecënie i Gdinie, ale Tomôsz Bòbin je dbë, co brëkòwné bãdze szukanié téż nowi kadrë. To znaczi, że Słëpsk dô nowé place robòtë. Direktór ùrzãdu téż jesz nie je wëbróny. Òficjalno jednostka mô zaczic fùnksnérowac pierszégò łżëkwiata, a w czerwińcu bãdze ju robiła na zwëczajny ôrt. Tedë téż mô sã skùńczëc rola Tomôsza Bòbina w dozéranim procesu ùsôdzaniô ùrzãdu, na spòdlim ùgôdënkù z ministrã.

H.S.Sz.

Załączniki