Pùstô zala na plenarnëch sesjach Eùroparlamentu to norma. Nie gòdzy sã na niã karno 60 młodëch eùropòsélców, jaczi zabédowelë jinszi fòrmat debatów.
Eùropejsczi Parlament mô przetestowac nowi fòrmat debatów na plenarnëch sesjach. Chòdzy ò zwikszenié zaangażowaniô eùropòsélców. Wedle dotëchczasnëch reglów, przed debatama rëchtowóné bëłë lëstë z nôzwëskama depùtowónëch razã z dokładnym czasã jich wëstąpieniô. Dzãka temù mòglë przëchadac na zalã na czile minut przed swòjim czasã wëpòwiescë, gadac na mównicë do pùstëch krzasłów, a pòtemù zôs wëchadac. Wiele pòsélców zwëskiwało z ti mòżebnoscë, przez co zala colemało òstôwała wnetka lózô, nimò że EP mô 720 nôleżników. Za to na Parlament bëło wiele òbskôrżeniów ò niepòwôżné pòdchôdanié do pòliticzi. Nowô ùdba przëjãtô z inicjatiwë karna 60 eùropòsélców za zgòdą przédniczczi Parlamentu Robertë Metsolë mô wëpróbòwac taczi ôrt debatów, w jaczim pòsélcowie, chtërny zgłosziwelë chãc wzãcô ùdzélu, bãdą wëwòłiwóny przez przédników i wiceprzédników sesje bez ùprzédno ùsadzony pòsobicë. Dzãka temù bãdą mùszelë sedzec na zalë całą sesjã i słëchac, co jinszi depùtowóny mają do rzekniãcô. Pò dwùch debatach w tim tidzeniu wënik eksperymentu mô òstac òbtaksowóny przez przédnictwò Eùroparlamentu.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie