Gmina Czersk rëchtëje sã do ùsadzeniô nowëch kóńsczich szlachów. W przińdnoce doparłãczą sã do nich trzë jinszé gminë.
Bùrméster Czerska Daniél Szprãga gòscył w Miesczim Ùrzãdze przedstôwców samòrządzënë, nadlesyństwów, a téż chòwôczów kòni. Gôdelë ò ùdbie na ùsadzenié nowëch kóńsczich szlachów w gminie Czersk. Stegnë miałëbë bëc pòprowadzoné midzë môlowima kòniarniama. Za przëmiar wzãlë szlach w òkòlim Fùnczi w gminie Chònice. Bédënk dokładnégò pòłożeniô szlachów przedstawią ti sami chòwôcze, jaczi brelë ùdzél w pòtkanim z bùrméstrã – mają na to czas do pòstãpnégò pòtkaniô, jaczé wstãpno mô bëc zòrganizowóné w strëmiannikù. Zajinteresowóné nowima stegnama do ridowaniô są téż jinszé samòrządë. Inicjatiwa mô bëc wstãpã do ùsadzeniô szlachów w gminach Slëwice, Czôrnô Wòda i Òsecznô, jaczé òd strëmiannika dwa lata nazôd wespół z gminą Czersk twòrzą Związk Gminów „W Sercu Tëchòlsczich Bòrów”. Jegò célã je wespółrobòta kòl pòdjimiznów i dobiwanim na nie dëtków. Gminë chcą sparłãczëc ze sobą nowò pòwstałé szlachë, twòrzącë jadro rozcygającë sã midzë wòjewództwama pòmòrsczim a kùjawskò-pòmòrsczim.
Twoje zdanie jest ważne jednak nie może ranić innych osób lub grup.
Komentarze opinie