Reklama

Nalezlë anticzną bazylikã Witruwiusza

Klëka

22/01/2026 19:28

Imaginary likeness of Vitruvius (19th-century bust by Giacomo Grigolli). Òdj. Mikceo; zdrzódło: https://pl.wikipedia.org/wiki/Witruwiusz#/media/Plik:Busto_di_Vitruvio.jpg

Archeòlogòwie zazdrzelë do stôrëch partësów i trafilë céch kòlumnów anticzny bazyliczi. Je to jedurny bùdink, ò jaczim je wiedzec, że zaprojektowôł gò Witruwiusz.

W gardze Fano w Ankóńsczi Marchie we westrzédny Italsce archeòlogòwie nalezlë plac, w jaczim czedës stojała anticznô rzimskô bazylika. Òb czas szëkbë trafilë na céch sztërzech kòlumnów. Gdze stojałë jinszé, òbrechòwelë na spòdlim traktatu Witruwiusza, bùdownika wòjnowëch machinów i architekta żëjącégò w pierszim stalatim przed Christësã. To òn miôł zaprojektowac bùdink i pisôł ò nim w swòjim dokazu, jaczi je nôstarszim ùchòwónym traktatã ò architekturze. Dzãka jegò wskôzóm, czej archeòlogòwie zaczãlë kòpac, chùtkò trafilë szlachë néżnëch kòlumnów. Tak doznelë sã maklewno, gdze bëłë grańce bùdinkù. Mają terô ùdbóné kòpac głãbi, żebë òbaczëc, czë bãdze tam cos wicy do zbadérowaniô. Bazylika bëła skùńczonô w dzewiãtnôstim rokù przed Christusã i szlachòwno do jinëch rzimsczich bazylików robiła za targòwò-sądową halã. Szëkba za nią dérowała wnet piãcset lat. Italsczi minister kùlturë Alessandro Giuli rzekł, że to òdkrëcé je co nômni taczi wôdżi, co nalézenié grobnicë Tutanchamòna.

H.S.Sz.

Załączniki