Reklama

Nalezlë docygóny grób dArtagnana

Klëka

28/03/2026 16:23

Òdj. Jebulon; zdrzódło: https://pl.wikipedia.org/wiki/D%E2%80%99Artagnan#/media/Plik:DArtagnan_statue_Dumas_Gustave_Dor%C3%A9.jpg

Heroja ksążków Alexandre'a Dumas służił pòd Królã Słuńce i zdżinął dobiwającë Maastrichtu. Probòszcz jedny z parafiów i szukający za jegò grobã archeòlog rechùją, że ùdało jim sã nalezc môl jegò zachówkù.

W Niderlandach w Maastricht archeòlogòwie kùlë òb czas remòntu pòd pòdłogą Kòscoła Swiãtëch Piotra i Paùla. Dzejało sã to przë zgòdze probòszcza Josa Valczi. Ten je gwës, że pòd jegò kòscołã leżi cało mùszketérë Charlesa de Batz de Castelmore, znónégò lepi jakno grôf d'Artagnan. Ta historicznô pòstacjô gaskòńsczégò szlachcëca nôlepi je znónô z ùpamiãtnieniô w rómanach Alexandre'a Dumas ò trzech mùszketérach. Wòjôrz zdżinął w czasu òbledżi Maastricht w tësąc szescset sétmëdzesątim trzecym rokù jakno wódca francësczégò szturmù na holendersczé rowë. Wedle przekazów òstôł pòchòwóny w òbrëmim gardu. Ksądz Jos Valke je drëchã z archeòlogą Wimã Dijkmanã, jaczi ju dwadzesce òsmë lat szukô za grobã d'Artagnana. Czej robòtnicë trafilë gnôtë, Dijkman przëjachôł do Maastricht i pòcwierdzył, że ôrt zachówkù zgôdzôł sã z tim, jak òpisałë gò historiczné zdrzódła. Nalazła sã kòl niegò mòneta z czasów francëskò-holendersczi wòjnë, a w òbrëmim piersë bëła kùla òd mùszketu, òd jaczi miôł zdżinąc – zdroje wskazéwają, że kamrôcë pòłożëlë jã d'Artagnanowi prawie na piersë. Próbczi gnôtów òstałë zabróné na badérowania. Jeżlë pòcwierdzy sã òglowô identifikacjô cała, na przëmiôr to, czë w grobie leżôł chłop, a nié białka, badérzë ùgwësnią sã genealogicznyma badérowaniama. Do dzys bò żëją òtrokòwie òjca pòległégò heroji, ti zgòdzëlë sã ùprzëstãpnic swój materiał do przëmierzeniô z nalazłim szkeletã.

H.S.Sz.

Źródło i opracowanie własne