Tësące ewakùòwónëch, zarwóné mòstë i krokòdile na szasëjach – tak dzysdnia wëzdrzi jawernota w aùstralijsczim Queensland.
Òd piątkù 31. stëcznika w nordowò-wschòdny Aùstralie mòcné szladżi sprôwiają zalania całëch môlëznów, przez co tësące mieszkańców stanu Queensland mùszało bëc ewakùòwónëch – kòształo to żëcé jednã białkã pò tim, jak ji retënkòwi czôłen wpôdł na drzewò i sã zwrócył. W niechtërnëch placach przez 24 gòdzënë miało spasc nawetka 600 mm deszczu. Chòc w pòniedzôłk 3. gromicznika nakazë ewakùacje òstałë zamienioné na òstrzédżi, prognozë wiodra zapòwiôdają dalszé zaléwë òd dobiérającëch rzéków. Zawalił sã mòst nad Ollera Creek, jaczi béł partã aùtostradë Bruce Highway, co pòwëdłużało awariowé drodżi nawetka ò 700 km. Je to nôgòrszô takô szlaga w Queensland òd 60 lat. Stanowi Department Strzodowiszcza, Nôùczi i Innowacje wëdôł jesz jednã przestrzéga dlô mieszkańców: Na zalónëch drogach mògą bëc krokòdile, jaczé terô przez òstré wiodro szukają za spòkójniészima wòdama. Nëkający przed zaléwama mùszą bëc przërëchtowóny na pòtkanie z nima na wszëtczich drogach na nordze Queensland.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie