Reklama

Ni ma w Kartuzach placu dlô „Kaszëb”

Klëka

05/11/2025 09:46

Òdj. z facebookòwi starnë: Regionalny Zespół Pieśni i Tańca KASZUBY z Kartuz

Ju òsmë dekadów dzejającé karno piãc lat nazôd stracëło wielelatną sedzbã w Kaszëbsczim Dwòrze. Terô dzejają tam spòlëznowé òrganizacje, co wedle bùrméstra mòże przeszkòdzëc w pòwroce „Kaszëb” do bùdinkù.

Bùrméster Kartuz Mieczësłôw Gòłuńsczi dostôł peticjã ze sto szescdzesąt pòdpisama òd lëdzy, jaczi chcą wëdzeleniô stójnégò placu na brëkòwnotë regionalnégò karna „Kaszëbë”. Dôwni jegò sedzbą béł Kaszëbsczi Dwór przë Gduńsczi szasëje. Pò remònce w dwa tësące dwadzestim rokù bùdink dostałë midzë jinszima Klub Spòlëznowi Integracje, Centrum Spòlëznowëch Ùsłëgów i Klub Seniora, a ùprzëstãpniwóny je téż jinszim spòlëznowim òrganizacjóm wspiérającym òsobë starszé i wëkluczoné. Timczasã karno „Kaszëbë”, chtërno za rok chce fejrowac òsmëdzesątą roczëznã pòwstaniégò, ni mô gdze trzëmac swòjich òbleczënków i jinstrumentów. Prawie ò tim na slédny sesje kartësczi Miesczi Radzëznë gôdôł radny Pioter Małszëcczi, jaczi złożił peticjã i wniósk ò wëdzelenié dwùch jizbów w Kaszëbsczim Dwòrze na ùżiwk karna. Pòmòc w tim mô to, że „Kaszëbë” fùnksnérëją dzysdnia téż jakno stowôra. Bùrméster Gòłuńsczi gôdôł, że mògą bëc z tim jiwrë, bò bùdink je dzysdnia czësto jinaczi brëkòwóny, ale na gwës przëzdrzi sã wnióskòwi.

H.S.Sz.