Reklama

Ùniô regùlëje przewòżenié zwierzãt

Klëka

24/04/2026 08:05

Miéwcë psów, kòtów a fretków, co mają ùdbóné rézowac z nima pò Eùropejsczi Ùnie, mielëbë wiedzec ò nowëch zjinakach. Dzél z nich ju je w mòcë.

Òd strzodë dwadzestégò drëdżégò łżëkwiata na terenie całi Eùropejsczi Ùnie òbrzesziwają nowé regle co do przewòżeniô zwierzãt. Tikają òne psów, kòtów i fretków, tak w rézach midzë krajama Ùnie jak téż z ji bùtna, przewòżonëch w niehańdlowëch célach. Òbrzészkòwé są szczepienia procëm szałowi, a dlô zwierzãt z bùtna Ùnie téż badérowanié na bëtnosc procëmcałów procëm ti chòroscë. Wëjątkã są zwierzãta młodszé jak dwanôsce tidzeniów, ale tedë miéwca mùszi napisac òswiôdczenié, że młodé òd ùrodzeniô ni miało kòntaktu z dzëwima zwierzãtama, a jeżlë òstôwô òno zanôleżné òd matczi, òna mùszi bëc szczepionô. Ten wëjątk dzejô blós w niechtërnëch krajach. Zwierzãta mùszą pòchadac z zaregistrowónëch hodowlów, a téż z zaregistrowónëch schroniszczów bez przëtrôfków szału miesąc przed adopcją. W jednym wòzu mòże bëc nôwëżi piãc zwierzãt, chëba że miéwca wieze je na jaczis kònkùrs, wëstôwk czë spòrtowé wëdarzenié – tedë mùszi dac zaswiôdczenié ò jich ùdzélu. Zwierzãtóm mùszi wiedno towarzëc jich miéwca abò wëznaczonô przez niegò òsoba. Òd rujana mają bëc òbrzészkowé swiôdectwa zdrowiégò, a òd nowégò rokù wéńdą téż nowé paspòrtë i regle identifikacje. Paspòrtë bãdą wëdawac weterinarze na spòdlim pòdôwków z mikroczipów, abò téż z tatuażów ù starszich zwierzãt.

H.S.Sz.

Załączniki