Domôcy areszt dlô ùszłégò prezydenta Francje je sztrôfą za kòrupcjã i hańdel infòrmacjama. To nié kùńc procesów pòlitika.
W piątk 7. gromicznika zaczął sã domôcy areszt ùszłégò prezydenta Francje Nicolasa Sarkòzégò. Pò pôłnim w jegò dodomù założëlë mù na nogã elektroniczną bransoletkã, dzãka jaczi służbë bãdą mògłë sprawdzac, w jaczich placach przebiwô skôzóny pòlitik. Bãdze mógł òpùszczac plac zamieszkaniô òd gòdzënë ósmi reno do ósmi wieczór, a w niechtërne dni ò półtori gòdzënë dłużi. Na dalszé rézë Sarkòzy bãdze brëkòwôł apartnëch zezwòleniów. To pierszi taczi métel dozéru ùżëti na ùszłi głowie państwa. Nicolas Sarcozy, chtëren béł prezydentã Francësczi Repùbliczi w latach 2007-2012, béł òbskôrżony ò kòrupcjã i hańdel krëjamnyma infòrmacjama, w czim brelë téż ùdzél adwòkat Thierry Herzog i sãdza francësczégò Kasacjowégò Sądu Gilbert Azibert, chtërny téż òstelë skôzóny na domôcy areszt. Wërok òstôł wëdóny w 2021 rokù, a łoni w gòdnikù Kasacjowi Sąd òdrzucył apelacjã Sarkòzégò. Pòlitik bierze téż dzysdnia ùdzél w jinszim procesu w związkù z docyganiama, że jegò prezydenckô kampaniô w 2007 rokù bëła prowadzonô z dëtków Libie rządzony przez diktatora Muammara Kadafiégò – to dochôdanié skùńczi sã dzesątégò łżëkwiata.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie