To pierszé òd wëbùchù wòjnë direktné negòcjacjowé pòtkanié delegacje rusczi z ùkrajińską. Nôwôżniészą pòdjimniãtą decyzją mô bëc wëmiana pò tësąc pòjmańczików.
W piątk szestnôstégò maja w Stambùle ùkrajińskô i ruskô delegacjô pòtkałë sã na półtoragòdzynnëch negòcjacjach, pierszich òd atakù Rusczi na Ùkrajinã w dwa tësące dwadzestim drëdżim, w jaczich wzãłë ùdzél òba państwa. Ùkrajińską starnã reprezentérowało karno ministra òbarnë Rustema Ùmierowa, a ruską delegacją czerowôł Władimir Miedińsczi, dorôdca Pùtina. Pòtkanié prowadzył Minister Bùtnowëch Sprôw Tërecczi Hakan Fidan. Ruscë przedstawilë swòje warënczi zawieszeniô barnie, jaczé bëłë nié do przëjimniãcô dlô Ùkrajińców: wëcopanié ùkrajińsczich wòjsków z òbwòdów ługańsczégò, doniecczégò, chersońsczégò i zapòrosczégò, z grozbą òkùpacje charkòwsczégò i sumsczégò w przëtrôfkù òdmòwë. Reprezentancë Rusczi scwierdzëlë téż, że Federacjô je w sztãdze prowadzëc ta wòjna jesz przez lata. Delegacje miałë za to ùgadac wëmianã pòjmańczików, pò tësąc sztëk òd òbùch starnów. Data ti wëmianë òstała ùstalonô, ale jesz ni mòże bëc pùbliczno pòdónô. Gôdelë téż ò mòżebnoscë zrëchtowaniô delegacjów z ùdzélã Zełeńsczégò i Pùtina, jakno prezydentów biôtkùjącëch państwów.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie