Nie pitelë ò nic, zabrelë psë i òdjachelë

Firma DetailingHouse z Rekcëna gôdô, że òrganizacjô z Dólnégò Szląska prosto jim psë ùkradła. Weterinôrz, chtëren jich dozérôł, gôdô, że krziwda sã jima nie dzejała.

Kòntrowersjowô priwatnô òrganizacjô ò pòzwie Dólnoszląsczi Szpektorat Òchrónë Zwierzãt pò niedôwnym wërokù sądu w Seradzu w sprawie bezprawnégò zabraniô psa zapòwiôdała kùńc dzejaniô. Dzejô równak zôs i wrëgnãła téż na Pòmòrzé. Z terenu firmë DetailingHouse z Rekcëna w gminie Pruszcz zabrelë dwa psë, Rekcza i Viki, jaczé żëłë tam na pòdwòrzim òd przez dzesãc lat. Wedle przëdstôwców òrganizacje, żëłë w lëchëch warënkach. Na swòjich spòlëznowëch mediach na dokôz tegò pòkôzelë òdjimczi tószów. Bëło widzec zeloné plachce na cele Rekcza – napiselë, że jegò miãso trëpieje za żëcô. Timczasã weterinôrz Andrzéj Pëlińsczi, jaczi zajimôł sã psama i béł na placu òb czas interwencje aktiwistów, pòwiedzôł, że pies béł pòpriskóny preparatã procëm chòroscóm skórë, chtëren dôwô zeloną farwã. Òba psë bëłë ju stôré i stądka miôł wëchadac jich lëchi wëzdrzatk, a gwôscëcél firmë pòdczorchiwô, że robòtnicë sã nima dobrze zajimelë i pò czile razy w miesącu bëlë z nima na wizytach. Aktiwiscë nie pitelë ò ksążeczczi zdrowiégò ani historiã lékarzeniô psów. Grozëlë gwôscëcélowi sôdzą i zapakòwelë psë do bagażnika swòjégò bùsa. Mielë je szarpac i prowadzëc na pòwrózkach òbwitëch wkół szëji, a w bùsu je przewòżelë bez zabezpieczeniô, razã z jinyma zwierzãtama. Òrganizacjô cwierdzëła, że firma próbòwała jich zamknąc na swòjim pòdwòrzim – gwôscëcél mówi, że brómë aùtomaticzno sã zamikają. Na plac wezwónô bëła pòlicjô. Aktiwiscë znikwilë mechanizm czerëjący brómą, a tedë jeden z szandarów kôzôł robòtnikóm dac jim òdjachac. Òd tegò czasu wiadã ò swòjich psach DetailingHouse bierze leno ze spòlëznowëch mediów Dólnoszląsczégò Szpektoratu Òchrónë Zwierzãt. Ten chãtnëch sã jim przëzdrzec rôczi do Wòjtiszków w łódzczim wòjewództwie. Złożił téż zawiadomienié na firmã do prokùraturë w Pruszczu, ale nié w sprawie lëchégò zajimaniô sã psama, le w sprawie zamkniãcô jich na terenie firmë. Na dzejania òrganizacje są skardżi z całi Pòlsczi – aktiwiscë przëjéżdżają, nie pitają ò dokùmentë, nagriwają filmiczi na ùżiwk mediów i zabiérają zwierzãta do swòjich sedzbów.

H.S.Sz.