Reklama

Nieszmaczné szpòrtë kandidata na ambasadora

Klëka

17/01/2026 16:10

Sedzba rządu Islandie. Òdj. APK; zdrzódło: https://pl.wikipedia.org/wiki/Islandia#/media/Plik:Stj%C3%B3rnarr%C3%A1%C3%B0sh%C3%BAsi%C3%B0_2023.jpg

Jedną wëpòwiescą Billy Long zagrozył swòji kandidaturze na ambasadora Zjednónëch Stanów na Islandie. Jegò szpòrt Islandczików nie rozbawił.

Łoni w zélnikù pòlitik amerikańsczi partie Repùblikanów Billy Long òstôł nominowóny przez prezydenta Donalda Trumpa na ambasadora Zjednónëch Stanów na Islandie. W smùtanie Departament Stanu òficjalno ùznôł gò za spòsobnégò do tegò zadaniô, a Senat w kùńcu fòrmalno gò nominowôł na ambasadora we wtórk trzënôstégò stëcznika. Jesz tegò samégò dnia Long brôł ùdzél w pòsedzenim Jizbë Reprezentantów, na jaczim gôdôł, że Islandiô stónie sã piãcdzesątim drëdżim stanã, a òn ji gùbernatorã. Wiadła pòdôwałë, że gôdôł to w szpòrtach, le Islandczicë żëczno tëch szpòrtów nie przëjimnãlë, òsoblëwie zdrzącë na zaòstrzenié amerikańsczi zagrańczny pòliticzi òd zôczątkù rokù, w tim wedle Grenlandie, òd jaczi do Islandie je niedalek. Islandzczé Ministerstwò Bùtnowëch Sprôw skòntaktowało sã z ambasadą w célu wëwidnieniô sprawë. Z òbëwatelsczégò pòrëchù wëszła téż peticjô do ministrë bùtnowëch sprôw Þorgerður Katrín do tegò, żebë òdrzucëła kandidaturã Billégò Longa, a Zjednóné Stanë wezwała do wëbiéru òsobë, jakô bãdze òkazewac Islandczikóm wicy ùwôżaniô. Long spitóny ò swòje słowa przez gazétników niezanôleżny agencje Arctic Today rzekł, że nie béł swiądny kòntrowersjów, jaczé jegò słowa sprawiłë na Islandie. Tłómacził sã, że sã tej òbôcził z dôwno niewidzónyma drëchama, jaczi szpòrtowelë so ò zrobienim z Grenlandie piãcdzesątégò pierszégò stanu, tej òn sã le do tegò przëparłãcził. Przeprosył za swòje słowa i pòwiedzôł, że bãdze miôł starã prowadzëc brzadną wespółrobòtã z Islandczikama.

H.S.Sz.

Załączniki