Reklama

Niesztandardowi ùrlop japòńsczi bùrmésterczi

Klëka

07/07/2026 19:35

Radnica w Yawata. Òdj. アラツク; zdrzódło: https://en.wikipedia.org/wiki/Yawata#/media/File:Yawata_city_hall.JPG

Przez sztërë miesące gardã Yawatą mô sã zajimac zastãpnik bùrmésterczi, chtërna je niesama i mô ùrodzëc dzeckò w séwnikù.

W maju na gazétny kònferencje Shoto Kawata, bùrmésterka gardu Yawata w japòńsczi prefekturze Kioto, ògłosëła, że weznie mateczny ùrlop. Mô òn dérowac òd pòłowë lëpińca do pòłowë smùtana – termin pòrodu mô wëznaczony na westrzódk séwnika. W Japònie ni ma przepisów, jaczé bë regùlowałë mateczné ùrlopë dlô wëbiérónëch ùrzãdniczków. Dlôte bùrmésterka na te sztërë miesące chce przekazac swòje òbrzészczi zastãpnikòwi, Shigeto Nosémù. Je to pierszi przëtrôfk w Japònie, jak bùrmésterka òdstãpiwô òd swòji robòtë dlô skùpieniô sã na cążë i dzeckù ju pò ùrodzenim. Òd czasu ògłosu przez krôj przeszła pòwszechnô debata midzë przëstojnikama a kritikama Shoto Kawatë. Jedny chwôlą białkã za pòstawienié na swòje zdrowié ë rodzëznã dôwającë dobri przëmiar spòlëznie z tak wiôldżima demògraficznyma jiwrama, jak mô Japòńskô. Wskazéwają téż na to, że przë felënkù regùlacjów z mëslą ò białkach, decyzje bùrmésterczi ni mòże kritikòwac. Procëm temù są głosë ò ji nieòdpòwiedzalnoscë, wzéwającé do cawny rezygnacje białczi z ùrzãdu abò òbniżeniô ji wëpłatë. Sama bùrmésterka barni swòji ùdbë i cwierdzy, że kritikòwanié pòliticzków bierzącëch mateczné ùrlopë mòże czësto zasztopac drogã do pòliticzi białkóm w rozrodczim wiekù. I dzysdnia w Japònie ùdzél białków w samòrządowi pòlitice je baro môłi. Blós sztërë procent przédników samòrządów to białczi. Badérowania z łońsczégò rokù wëkôzałë, że òd dôwaniô sã na taką kariérã Japònczi strzëmiwô mòżebnosc cążë, gnãbienié w robòce i przekònanié, że pòlitika to robòta dlô chłopów.

H.S.Sz.

Źródło i opracowanie własne