Reklama

Nigeriô wëcopiwô sã z ùczeniô dzecy w rodnëch mòwach

Klëka

15/11/2025 09:20

Dôwny minister pòùczënë w Nigerii Adamù Adamù. https://en.wikipedia.org/wiki/Adamu_Adamu#/media/File:Adam-Adamu.jpg

W spòdlecznëch szkòłach w Nigerie ùczbë bãdą zôs prowadzoné pò anielskù – wedle rządu brëkòwanié lokalnëch jãzëków przënôszało lëché efektë i ùcãżiwało dalszą nôùkã.

Rząd Nigerie ògłosył, że wëcopiwô sã z ùżiwaniô rodnëch jãzëków szkòlôków òb czas ùczbów w spòdlecznëch szkòłach. Bëłë òne wprowadzoné niecałé trzë lata nazôd, czej ministerstwã pòùczënë czerowôł Adamù Adamù. Wedle jegò ùdbë wprowadzenié przëmùsu prowadzeniégò zajmów w rodnëch mòwach mòże dac lepszé edukacjowé efektë. Wedle terny ministrë pòùczënë Tunji Alaùsë brzôd pòzmianë béł czësto procëmny, a w òbéńdach, gdze rodné gôdczi stałë sã mùszowé miast donëchczas òbrzesziwającégò anielsczégò, òsëdżi stałë sã niższé. Przez to mùsz brëkòwaniô rodnëch jãzëków mùszi òstac copniãti jak nôchùdzy. Przëstojnicë pòwrotu do anielszczëznë gôdają téż, że na taką zjinakã nigerijskô pòùczëna prosto nie bëła fardich, bò felowało dobrze przërëchtowónëch szkólnëch, a sama zjinaka bëła krótkòzdrzélnô, czej wôżniészé ekzaminë i całô edukacjô w pòstãpnëch stãpniach edukacje je i tak prowadzonô pò anielskù. Dało téż równak czëc głosë, że z projektu ministerstwò wëcopało sã za chùtkò, a trzë lata to nie je dosc, żebë rzetelno rzeknąc, jaczi béł brzôd przëjimniãtégò rozrzeszeniô.

H.S.Sz.