Nowô demògraficznô pòlitika Chin

Jesz do niedôwna rząd zniechãcywôł rodzëznë do miecô dzecy – terô chce zniechãcëc jich do kùpiwaniô antikòncepcje. Kriticë ùdbë cwierdzą, że nót pòłożëc cësk na co jinszégò.

Chinë do dwa tësące piãtnôstégò rokù bëłë znóné z „pòliticzi jednégò dzecka”, jakô nakłôdała na rodzëznë negatiwné kònsekwencje za wëdôwanié na swiat wicy jak jednégò dzecka. Zôkôz òbrzesziwôł òd tësąc dzewiãcset sétmëdzesątégò dzewiątégò rokù i òstôł wprowadzony procëm przelëdzeniémù. Òd dwa tësące szestnôstégò limit òstôł zmniészony do dwòjga dzecy, w dwa tësące dwadzestim pierszim w maju do trojga, a w lëpińcu limitë òstałë zniosłé. Terô òd nowégò rokù rząd zaczinô pòlitikã zachãcywaniô Chińczików do miecô dzecy, z pòzdrzatkù na starzenié sã lëdztwa. Pierszi krok to wprowadzenié trzënôsceprocentowégò pòdatkù na przedôż antikòncepcjowëch métlów, w mòcë òd pierszégò stëcznika. Zmniészony òstôł za to pòdatk VAT òd ùsłëgów zrzeszonëch z żéńbą a téż òpieką nad starszima lëdzama. Dalszé planë rządu dlô promòcje zakłôdaniô rodzëznë to wëdłużenié ùrlopów dlô rodzëców i dëtkòwé wspòmóżczi. Z tëch zmianów zapòwiedzónëch łoni w Chinach nôwicy kòntrowersjów sprawił pòdatk na antikòncepcjã. Je gôdka ò tim, że wëższi priz za te métle nie zmieni lëdzczich zwëków. Wedle kòmentatorów ti, jaczi bãdą sobie mòglë na to pòzwòlëc, dali bãdą je kùpiwac, bò kòszt dërch bãdze wiele niższi jak za wëchòwanié dzecka. Wedle badérowaniów z dwa tësące dwadzestégò czwiôrtégò Chinë są pòd tim pòzdrzatkã jednym z nôdrogszich krajów na swiece – na pierszim placu je Pôłniowô Kòreja. Za to lëdze z biédniészich rodzëznów a téż szkòłownicë czë sztudérze niechcący prosëc starszich ò dodôwkòwé dëtczi na antikòncepcjã wedle chińsczich socjologów bãdą decydowac sã na seks bez zabezpieczeniów, co równak téż nie ùprawi demògrafie – w Chinach wcyg je szeroczi ë tóny przistãp do abòrcje, a téż pòwszechnô akceptacjô ti prakticzi. Kriticë ùdbów Kòmùnisticzny Partie Chin gôdają, że lepszi cësk dałobë maksymalné òbniżenié kòsztów ùtrzimaniô rodzëznë i wëchòwiwaniô dzecy, a téż inwesticje w zjinakã spòlëznowëch pòzdrzatków na familiã.

H.S.Sz.