Reklama

Nowé métle niderlandzczich banowëch

Klëka

07/10/2025 13:16

Aùtór: Jacek Rużyczka; zdrzódło: https://nl.wikipedia.org/wiki/Nederlandse_Spoorwegen#/media/Bestand:Koplopers_4091+4057_Haren.JPG

Sztëcznô inteligencjô w Niderlandach wspiérô banszandarów w sprôwdzanim bilietów – gôdô czedë i jak przeprowadzëc kòntrolã. Banowi rzeką, że ji doradë colemało sã sprôwdzają.

Òd zôczątkù rujana wëcmanizna Nederlandse Spoorwegen (Niderlandzczi Ban) wprowadzëła òstrzészé métlë na lëdzy jeżdżącëch bez bilietu. Jednym z nich je pòdwëższenié sztrôfów za taczi przejôzd z piãcdzesąt do sétmëdzesąt eùro. Wikszą zjinakã równak przëniosło wprowadzenié systému sztëczny inteligencje, jaczi bãdze dorôdzôł, czedë przeprowadzac kòntrolë. Na ùrządzenia banszandarów przëchôdają wiadła z infòrmacją ò wësoczim rizykù pasażérów bez bilietu w pòdónëch gòdzënach. System òbrechòwiwô to na spòdlim midzë jinszima tipów banów, gãstoscë hurmów na pòżdôwkach, a téż pòdôwków z ùszłëch kòntrolów. Mòże òn téż zabédowac przeprowadzenié kònkretnégò tipù kòntrolë. Banowi wskazéwają na wësoką skùtkòwnosc tëch métlów. Dzãka bédënkóm systémù w jedny wieczórny banie przë òrãdzë spòrtowëch rozegrów ùdało sã trafic kòl tësąc pasażérów bez bilietów. Cug òstôł tedë zascygniãti midzë stacjama, tak żebë nicht ni mógł z niegò wësadnąc. Banowi bãdą téż tej-sej sprôwdzelë bilietë przed wpùszczenim pasażérów do składu. Do tegò przë kòntrolë szandarzë dostôwają téż apartné wiadło, jeżlë prawie zeskanowóny biliet béł kùpiony zarô przed kòntrolą, na przëmiar przez mòbilną aplikacjã, czej sóm pasażéra wikszosc rézë jachôł bez niegò. Zarządzëna Niderlandzczégò Banu cwierdzy, że cawné rëmniãcé zjawiszcza jazdë na dzëkò nie je mòżebné, ale dzãka nowim zjinakóm ju ùdôwô sã wëchwacëc wiele wicy taczich przëtrôfków.

H.S.Sz.