Ùdbòdôwôcze nowi teczi mają nôdzejã na ji wëzwëskanié do rozwiju wizualny identifikacje Kaszub i promòcje wësziwaniô na mòderny ôrt.
Wëdôwizna Kaszëbskò-Pòmòrsczégò Zrzeszeniégò i gduńsczi part KPZ wëdałë nową tekã kaszëbsczégò wësziwkù, zatitlowóną Wzory haftu kaszubskiego szkoły żukowskiej w kompozycjach współczesnych hafciarek, z mòdłama zabédowónyma przez wësziwôczczi z Karna Sétmë Farwów (pòl. Klub Siedmiu Kolorów) ze Gduńska. Slédnô teka żukòwsczégò wësziwkù ùkôzała sã w rokù 2007. Wôrt przëbaczëc, że w rokù 2015 żukòwsczi ôrt kaszëbsczégò wësziwkù (pòl. hafciarstwo kaszubskie szkoły żukowskiej) òstôł wpisóny na Krajewą Lëstã Niematerialny Kùlturowi Spôdkòwiznë (pòl. Krajowa Lista Niematerialnego Dziedzictwa Kulturowego UNESCO). Przistãpné dotądka heftë tegò ôrtu wësziwkù przedstôwiałë w przédny rédze mòdło òbmësloné tak, cobë pasowało do tôflôków. W nowi tece jidze nalezc wzorë mniészégò fòrmatu, pasowné do ùżëcô na ruchnach, rubzakach i jinëch zachach codniowégò ùżiwkù, wedle dzysdniowëch pòtrzebów.
Wëdanié nowégò zestôwkù wzorów bëło mòżebné dzãka dofinancowaniémù Minystra Kùlturë i Nôrodny Spôdkòwiznë.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie