W sôdzë Rebibbia papiéż òdemkł swiãté dwiérze, do jaczich wiérny bãdą mòglë pielgrzimòwac òb czas jëbleùszowégò rokù 2025.
W òbrëmim jëbleùszowëch lat w Katolëcczim Kòscele je trzimóny zwëk òdmikaniô na czas waraniô taczégò rokù tpzw. „swiãtëch dwiérzów”, do jaczich wiérny mògą pielgrzimòwac, żebë dostac specjalny òdpùst. Z leżnoscë Jëbleùszowégò Rokù 2025 papiéż Frãcëszk w czwiôrtk 26. gòdnika òdemkł jedne z nich w niezwëczajnym placu: w sôdzë Rebibbia na przedmiescym Rzimù, jedny z nôwikszich w Italsce.
Zwëczajno „swiãté dwiérze” są òdmikóné we wëbrónëch wikszich bazylikach w Rzimie. Òdemkniãcé placu pielgrzimków w dzejający sôdzë je pierszim taczim przëtrôfkã w historie. Pò ceremónie Òjc Swiãti òdprawił mszã z ùdzélã sôdzewëch i robòtników zakładu.
– Jô chcôł òdemknąc dzys dwiérze tuwò. Pierszé jô òdemkł w bazylice sw. Piotra, a drëdżé ù waju. To je piãkny gest, żebë òdmëkac dwiérze szerok. Jesz wôżniészé je to, co to òznôczô: òdemkniãcé serca. Òdemkłé serca – to je dzejanié braterstwa. Serca zamkłé a cwiardé nie pòmôgają w żëcym. Dlôte łaska jëbleùszu mô rozszerzwiac i òdmëkac, w pierszi rédze òdmëkac serca na nôdzejã. Nôdzeja nie rozczarziwô, nigdë! – wëwidniwôł znaczenié gestu papiéż Francëszk.
Twoje zdanie jest ważne jednak nie może ranić innych osób lub grup.
Komentarze opinie