Wedle ùkrajińsczi kònstitucje nowé welacje bãdą mògłë bëc zrëchtowóné dopiérze pò pòdpisanim miru.
We wtórk dwadzestégò piątégò gromicznika Nôwëższô Radzëzna Ùkrajinë przëjãłã „Ùchwałã w sprawie wspiéraniô demòkracje” jakno òdpòwiesc na głosë ò mùszebnoscë przeprowadzeniô na Ùkrajinie nowi prezydencczi welacje. Przewidzónô kadencjô prezydenta Wòłodimira Zełeńsczégò skùńczëła sã łoni na zymkù, a wedle przekazu, jaczi szérzwi ruskô propaganda, mô to òznaczac, że Zełeńsczi rządzy nielegalno i miałabë bëc zrëchtowónô nowô welacjô. W slédnym czasu pòdchwôcył tã narracjã téż Donald Trump i jegò òkrãżé. Prezydent Zjednónëch Stanów nazéwôł Zełeńsczégò diktatorã, chtëren nie chce dopùscëc do welacje i gôdôł ò baro môłim pòpiarcym dlô jegò prezydenturë strzód Ùkrajińców. Nowô ùchwała ùkrajińsczégò parlamentu, przëjãtô głosama dwasta szescdzesąt òsmë pòsélców, òdpòwiedzała prawie na te òbwinë. Wedle ni „wòjnowy ùstôw wprowadzony na Ùkrajinie w związkù z fùlskalowim najachùnkã Rusczi Federacje nie pòzwòliwô na przeprowadzenié welacje zgòdą z kònstitucją”. Dali dokùment dôwô do wiadë, że nowi prezydent bãdze wëbróny pò zawiarcym sprawiedlëwégò i stójnégò miru, a Zełeńsczi mùszi sprawòwac dali swòjã fùnkcjã, a ani Nôwëższô Radzëzna, ani ùkrajińsczi nôród nie wątpią ò legalnoscë jegò mandatu.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie