Reklama

Nowi włôdca na tronie Luksembùrga

Klëka

04/10/2025 11:53

© European Union, 1998 – 2025; https://pl.wikipedia.org/wiki/Wilhelm_V_(wielki_ksi%C4%85%C5%BC%C4%99_Luksemburga)#/media/Plik:Trounwiessel_2025_EP_(115)_(cropped).jpg

Nowim wiôldżim ksyżëcã òstôł Wilem òd Nassaùów. Tak jak jegò òjc przez slédné dwadzesce piãc lat bãdze trzimôł w przédny rédze reprezentatiwną fùnkcjã.

W piątk trzecégò rujana w Luksembùrgù bëła ùroczëzna z leżnoscë zamianë na ksyżëcym tronie. Sétmëdzesątlatny wiôldżi ksyżã Henrik ùstąpił pò dwadzesce piãc latach panowaniô. Trón òbjął pò nim jegò sztërdzescëtrzëlatny syn Wilem. Na skłôdanim przez niegò przësëdżi na kònstitucjã przed parlamentã bëlë królowie a królewé Belgie i Niderlandów. Na wëstawioną pòd wieczór czestã w ksyżëcym pałacu przëjachelë téż prezydent Francje Emmanuel Macron i prezydent Niemców Frank-Walter Steinmeier, a téż przedstôwcë Eùropejsczégò Parlamentu i Eùropejsczi Radzëznë. Pòzdrówk i apòsztolsczé błogòsławieństwò dlô nowégò włôdcë przekôzôł téż papiéż Léón. Przez ten weekend wiôldżi ksyżã Wilem bãdze òbjéżdżôł krôj, a w niedzelã weznie ùdzél w ùroczësti mszë w luksembùrsczi mariacczi katedrze.

H.S.Sz.