Wedle prawny analizë zlecony pòznańsczi kancelarie przez wëszëznë Nôrodnégò Parkù „Tëchòlsczé Bòrë”, gmina Chònice mô leżnosc przejic sedzbã parkù w Charzëkòwach, gdze òdnądka miôł bë bëc ùrządzony Gminowi Òstrzódk Kùlturë.
Gmina mô starã ò przëjãcé tegò placu ju òd dwùch lat, a park dôwô zgòdã na zamianã môlów midzë dwùma subiektama. Żebë mògło sã to stac, swòjã zgòdã mùszi téż dac równak Ministerstwò Klimatu i Strzodowiszcza, jaczé òdpòwiôdô za prawné fùnksnérowanié nôrodnëch parków w Pòlsce.
Wëszëznë parkù bë sã miałë przeniesc do Chòcyńsczégò Młëna, na òbéńdã dzysdnia słëchającą gminie, gdze włôdze parkù dzejają ju òd jaczégòs czasu. Pò przekôzanim parkòwi téż tpzw. Pilsczi Drodżi, jidący ze wsë Bachòrzé do dãbù Bartusz, dzysdnia gminowi, całô zamiana bë mògła bëc przeprowadzonô bez dopłatë. To rozrzeszenié òstało przez òbie stronë ùznóné za nôbarżi zwëskòwné z piãc wariantów przedstôwionëch przez kancelariã.
Prawné zjiszczenié ti ùdbë bãdze mòżebné pò rozpòrządzenim ministerstwa ò òficjalnym ùznanim bùdinkù w Chòcyńsczim Młënie brëkòwónym przez NP „Tëchòlsczé Bòrë” za jegò nową sedzbã.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie