Pòd brómą Gduńsczi Òkrãtownie pòliticë przemôwielë ò demòkracje i patriotizmie, jaczé dobëłë 43 lata slôdë nad ùcëskã kòmùnisticznëch wëszëznów.
W piątk 13. gòdnika z òrãdzë 43. roczëznë wprowadzeniô wòjnowégò ùstawù w Pòlsce przed Brómą nr 2 Gduńsczi Òkrãtownie bëła zòrganizowónô ùroczëzna złożeniô kwiatów i znitów na wdôr òfiarów kòmunisticznëch rządów. Skłôdelë je m.jin. prezydentka Gduńska Aleksandra Dulkewicz a téż Lech Parell, jaczi je szefã Ùrzãdu do Sprôw Kómbatantów i Ùstëgòwónëch. W swòjich przemówieniach pòdsztrichiwelë znaczenié patrioticznëch i demòkraticznëch wôrtnosców, chtërne pòmògłë spòlëznie w wëkrëgniãcym so wòlnoscë òd tamtoczasnëch wëszëznów. Kwiatë złożëlë téż pòmòrskô wòjewòda Béjata Rutkewicz, marszôłk pòmòrsczégò wòjewództwa Mieczësłôw Struk, a téż jiny przedstôwcowie wëszëznów.
Wòjnowi ùstôw béł wprowadzony w 1981 rokù przez kòmùnisticzné włôdze przez Radzëznã Państwã na wniósk Wòjskòwi Radzëznë Nôrodnégò Retënkù dlô òpanowaniô demòkratnëch pòrëchów. Przez dzejania milicje i wòjska w tim cządze w całim kraju zdżinãło wicy jak 70 lëdzy, a wicy jak 10 tës. dzejarzi „Solidarnoscë” òstało internowónëch.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie