Papiéż Léón z Americzi

Dwasta szescdzesątim sódmim papieżã òstôł ùrodzony w Chicago kardinał Robert Francis Prevost.

We czwiôrtk ósmégò maja w drëdżim dniu kònklawe pò smiercë papieża Francëszka, w jaczim ùdzél brało sto trzëdzescë trzech kardinałów-elektorôw, na czwiôrtim welowanim na dwasta szescdzesątégò sódmégò biskùpa Rzimù wëbróny òstôł ùrodzony szescdzesąt dzewiãc lat dowsladë w Chicago kardinał Robert Francis Prevost, nôleżnik zôkònu aùgùstianów. Jegò biskùpim zawòłanim je „In Illo uno unum” – „W Nim jednym jedno”. Òd dzys dëchòwny bãdze znóny jakno papiéż Léón, sztërnôsti tegò miona.
Biôłi dim òznôczający wëbiér nowégò papieża pòkôzôł sã òsmë minut pò szósti wieczór, a trzënôsce minut pò sódmi jegò juwernotã ògłosył kardinał protodiakón Dominique Mamberti. Za czilenôsce minut Papiéż-Amerikón pòkôzôł sã lëdztwù na Placu Swiãtégò Piotra i òbzérającémù transmisje w mediach. Dôł przemòwã pò italskù, zapòwiôdającë cygniãcé dali błogòsławieństwa, jaczé swòjim pòntifikatã dôł Francëszk. „Bóg chce dlô naju dobrze, Bóg waju wszëtczich kòchô, a zło nie dobãdze! Më wszëtcë jesmë w Rakù Bòga. Tedë, bez ùrzasu, rãka w rãka zjednóny z Bògã i jedny z drëdżima jidzemë w przódk. Më jesmë Ùczniama Christësa. Christus naju prowadzy. Swiat brëkùje Jegò Widu. Lëdztwù je Gò nót jakno mòstu, pò jaczim sã przéńdze do Bòga i Jegò Miłoscë. Pòmòżëta sobie, jedny drëdżim, bùdowac te mòstë przez dialóg, przez pòtkanié, parłãczącë naju wszëtczich do bëcégò jednym lëdã, wiedno w mirze. Dzãka papieżowi Francëszkòwi!” – gôdôł. Zwrócył sã téż pò szpańskù do swòji lubòtny diecezje Peru, gdze służił jakno misjonôrz. Òdmówił téż Anielsczi Pòzdrówk, a w kùńcu ùdzelił błogòsławieństwa Urbi et Orbi (Gardowi i Swiatu). Na Placu Swiãtégò Piotra zeszło sã na tã leżnosc kòl sto tësący sztëk lëdztwa. 

H.S.Sz.