Chłopi bez bilietu pòbilë czerownika banë i zwiornãlë. Szandarzë ju jich zatrzimelë.
W niedzelã dwadzestégò trzecégò strëmiannika ze stacje Wejrowò-Smiéchòwò do Chùtczi Gardowi Banë w czerënkù banowiszcza Wejrowò weszło dwùch mieszkańców gardu. Czej czerownik banë spitôł jich sã ò bilietë, òkôzało sã że jich ni mają. Zaczãlë grozëc banowémù, chtëren w kùńcu nie dôł jima dëtkòwi sztrôfë. Czej cug ju skùńcził biég, a czerownik béł wëszłi z banë i stojôł na peronie, agresywny chłopi pòdeszlë do niegò i gò pòbilë. Kòpelë gò pò całim cele, nawetka ga ten leżôł na zemi. Nicht z pasażérów, jaczich na peronie bëło dosc tëli, nie pòmógł banowémù, le na nagraniach z mònitoringù je widzec, że wszëtkò wëdarzëlo sã baro chùtkò. Sprôwcë zwiornãlë z placu, a pòbiti zazwònił na pòlicjã i pòjachôł do bòlëcë na òbdukcjã. Na szczescé ni miôł złómaniów, a jegò żëcémù nick nie zagrôżô. W pòniedzôłk wejrowskô pòlicjô dała do wiadë, że szandarzë zatrzimelë dwùch chłopów w wiekù sztërdzescë sztërë i trzëdzescë jeden lat, jaczi są pòdezdrzóny ò atak na banowégò. Òdpòwiedzą za atak na pùblicznégò ùrzãdownika, za co grozy jima do trzech lat sôdzë.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie