Reklama

Pùcz na Madagaskarze

Klëka

13/10/2025 13:02

Andry Rajoelina (2022 r.); https://pl.wikipedia.org/wiki/Andry_Rajoelina#/media/Plik:Andry_Rajoelina_(cropped)_2022.jpg

Zaczãło sã òd protestów procëm felënkóm wòdë i paùzóm w dotëgòwiwanim sztrómù, a terô zbùntowónô elitarnô wòjskòwô jednostka ògłôszô dobëcé kòntrolë nad całą armią.

Òd czedë w séwnikù w Antananariwie, madagaskarsczi stolëcë, przed mirnyma demònstracjama aresztowóny òstelë zaangażowóny w jich òrganizacjã pòliticë, w kraju ùrosła rësznota òpiéru wedle rządu. Rëgnãłë protestë, z zôczątkù w stolëcë, a dali w pòstãpnëch gardach. Wiôlgą rolã w jich òrganizacje graje młodzëznowô rësznota Gen Z Mada, jakô wzéwała do ùstąpieniô prezydenta, rozrzeszeniô senatu, nôwëższégò sądu i centralny welowny kòmisje. Prezydent rozrzesził rząd, le to demònstrantóm nie sygło. W sobòtã jednôstégò rujana elitarnô wòjskòwô jednostka CAPSAT wezwała jinszich wòjskòwëch do przëparłãczeniô sã do protestów i staniãcô procëm wëszëznóm. Prezydent Madagaskaru Andry Rajoelina w niedzelã wëdôł przez swòje bióro kòmùnikat, w jaczim scwierdzył, że dérëje próba nielegalnégò przejimniãcô władzë na mòc, a téż wëdôł wezwã do pòspólny òbarnë kònstitucjowégò òrdągù i nôrodny suwerennoscë. Czile gòdzyn pòtemù pòstãpny kòmùnikat wëdôł CAPSAT – tą razą dôł do wiadë, że mô ju kòntrolã nad wszëtczima ôrtama wòjsków i wëbrôł nowégò szefa sztabu armie, generała Demòstenégò Pikùlasa.

H.S.Sz.