Reklama

Pòdwòdné mòdżiłë bãdą do zwiédzaniô?

Klëka

16/02/2026 11:03

Print screen ze starnë https://baltictech.com/

Òkrãtë zatopioné òb wòjnã dzysdnia są wëłączoné ze zwiédzaniô dlô rekreacjowëch pòdwòdników. Gdińskô stowôra chce to zmienic.

Przedstôwcë stowôrë pòdwòdników Baltictech ze Gdinie chcą zletczeniô reglów co do schôdaniô pòd wòdã w òkòlé achtów zatopionëch òkrãtów. Dzysdnia te, co bëłë zatopioné òb czas wòjnowëch dzejaniów, nôczãscy mają sztatus pòdwòdnëch smãtarzów. Schadac na nie mògą leno badérowie i kònserwatorze za apartną zgòdą Mòrsczégò Ùrzãdu. Dzejarze Baltictechù chcą, żebë ùprzëstãpnic achtë téż rekreacjowim pòdwòdnikóm pòd warënkã, że w zôtorzë towarzëc jim bãdze certifikòwóny pòdwòdnik-prowadnik. Ten bãdze dozérôł grëpë turistów ë instruòwôł ò tim, jak sã słëchô zachòwac na taczi mòdżile. Ùdba je wzãtô z przepisów òkòma achtë britijsczégò òkrãtu SS „Thistlegorm” na dnie Czerwionégò Mòrza. Baltictech bédëje na zôczątk wprowadzëc taczé regle dlô niechtërnëch niemiecczich òkrãtów zatopionëch òb wòjnã, co leżą na dnie ù kaszëbsczégò ùbrzegù: „Wilhelma Gùstloffa”, „Goyi” ë „Steubena”. To je ju pò pierszim pòtkanim w ti sprawie. Brôł w nim ùdzél senatór Kadzmiérz Kleina, jaczi je za aktualizacją dzysdniowëch reglów i deklarëje pòmòc stowôrze.

H.S.Sz.

Źródło i opracowanie własne