Reklama

Peticjô w sprawie jizbów cëszë

Klëka

13/12/2025 15:45

Print screen ze starnë https://spektrummozliwosci.eu/

Trzôsk w szkòłach mòże bëc òsoblëwim jiwrã dlô szkòłowników w spektrum aùtizmù. Zwëskac mògą na ùdbie równak wszëtcë, bò zwãczi w szkòłach wëchôdają dalek bùten przëjimniãtëch normów.

Zwëczajnô Stowôra „Spektrum Mòżebnosców” prowadzy peticjã do pòmòrsczich samòrządów. Domôgô sã, żebë w krézach kòscersczim, kartësczim, gduńsczim i stargardzczim w kòżdi szkòle wëżispòdleczny, warkòwi i specjalny prowadzony przez samòrządzënã pòwstała co nômni jedna tak pòzwónô jizba cëszë. Chòdzy ò wëdzelony rum, w jaczim szkòlôcë mòglëbë òdpòczic òd szkòłowégò trzôskù, òbdac sã i skùpic. To bëłobë dobré rozrzeszenié dlô lëdzy w spektrum aùtizmù, ale nié blós, bò trzôskù i jegò skùtków doswiôdczają wszëtcë. Wedle òbtaksowaniów òb czas paùzów w szkòłach, òsoblëwie spòdlecznëch, zwãczi sygają nawetka dzewiãcdzesąt òsmë decybelów. Stowôra bédëje téż alternatiwné rozrzeszenia tam, gdze przez felënk dëtków ni mòże wëdzelëc specjalny jizbë jakno conã cëszë. Mòże na przëmiar kùpic akùsticzné kabinë, wëznaczëc jednã zalã jakno zastãpinã jizbë cëszë òb czas paùzów, ùsztëmòwac głosnosc zwónków abò zamòntowac wëcyszającé dwiérze. Nie je to pierszé dzejanié Stowôrë w ti sprawie, bò zwënégã miała ju w gminach kòscersczégò krézu – jizbë cëszë abò szlachòwné rozrzeszenia ùsadzëłë spòdleczné szkòłë w Kòscérznie, gminach Nowô Karczma, Lëpùsz i Liniewò. Peticjô òd piątégò gòdnika je przistãpnô w Internece, a Stowôra mô pòwrózczi do ni pòdóné na swòjich spòlëznowëch mediach.

H.S.Sz.