Piãcdzesątlecé doktoratu Józefa Bòrzëszkòwsczégò

W ten historiczny dlô Gduńsczégò Ùniwersytetu dzéń na kòridorach òsoblëwie zaznaczëłë swòjã bëtnosc kaszëbsczé symbòle a téż jãzëk.

Piãcdzesątô szóstô roczëzna ùsadzeniô Gduńsczégò Ùniwersytetu w piątk dwadzestégò strëmiannika przebiegła w richtich kaszëbsczim ùstawie. To z leżnoscë sparłãczeniô òbchòdów z òdnową doktoratu Józefa Bòrzëszkòwsczégò. Ùroczëznë zaczãłë sã òd wëwieszeniô kaszëbsczi fanë z pòrëchù Karna Sztudérów Pòmòraniô przed bùdinkã Wëdzélu Historicznégò i Wëdzélu Filologicznégò. Przërôczoné karno „Kaszëbë” z Kôrsëna òdegrało òba kaszëbsczé himnë, a pòzeszłi dopòmòglë spiewã. Przemôwiôł krótkò przédnik Pòmòranie Iwò Miszkòwiôk. Fana mô wisec przed tim bùdinkã ju wiedno kòl pòlsczi. Pò wëwieszenim pòzeszłi bëlë przërôczony na ùroczësté pòsedzenié senatu Gduńsczégò Ùniwersytetu. Tam ògłoszony i przedstawiony bëlë badérowie a akademicczi szkólny achtniony za miniony rok nôdgrodą Karóla Taylora i nôdgrodą Mrągòwiusza. Nôòsoblëwszégò achtniãcô doznôł równak zasłużony dlô pòznaniô kaszëbsczi ë pòmòrsczi historie profesór Józef Bòrzëszkòwsczi, dlô jaczégò z inicjatiwë profesora Cezarégò Òbracht-Prondzyńsczégò ùczbòwniô dała sã zòrganizowac òficjalną òdnowã doktoratu, w piãcdzesątlaté jegò òbarnë. To pierszô takô ùroczëzna w historie Gduńsczégò Ùniwersytetu. Pò laùdacje wëgłoszony przez profesora Òbracht-Prondzyńsczégò, rektór Pioter Stepnowsczi òdczëtôł zamkłosc diplomù i gestã pòłożeniô berła na remieniu Józefa Bòrzëszkòwsczégò òdnowił jegò doktorat. Pòtemù profesór dôł wëkłôd „W drodze. Lëdze i môle”, jaczi sóm òb czas òdczëtu pòzwôł „wspòminkama” ò swòjim żëcym, òsoblëwie młodëch latach szkòłë, sztudiów i zôczątków nôùkòwi robòtë. Ùroczëzna na zalë skùńczëła sã òdspiéwanim przez akademicczi chór Gduńsczégò Ùniwersytetu piesniów „Mòje stronë” Jana Piepczi ë „Tam gdze Wisła” Hieronima Derdowsczégò. Na sóm kùńc kòżdi miôł leżnosc złożëc profesorowi Bòrzëszkòwsczémù gratulacje i pòdzãkòwania za dłudżé dzesãclata wëtrëwałi robòtë w służbie kaszëbsczi historie, narracje a juwernoce.

H.S.Sz.