Reklama

Piãcset tësący kòntów do rëmniãcô

Klëka

05/12/2025 10:01

Ze swiata, Piãcset tësący kòntów rëmniãcô - zdjęcie, fotografia

Tidzéń przed òficjalnym zôkazã kònta brëkòwników spòlëznowëch mediów w Aùstralie zaczãłë znikac. Dlô firmów, jaczé nie ùsłëchają, wëmierzoné są wësoczé sztrôfë.

Firma Meta ùsłëchała rozpòrządzeniô aùstralijsczégò rządu i òd czwiôrtkù czwiôrtégò gòdnika zaczãła rëmac kònta brëkòwników mni jak szesnôsce lat stôrëch. Kòl sto piãcdzesąt tësący kòntów na Facebookù i trzësta piãcdzesąt tësący na Instagramie i Threads mô bëc rëmniãté do strzodë dzesątégò gòdnika. Tedë wchôdô w żëcé zôkôz dôwaniô mòżebnoscë trzimaniô kòntów na spòlëznowëch mediach òsobóm niżi wëmôgónégò wiekù. Sztrôfë dlô firmów za złómanié reglów mają sëgac równoznaczënë wnet sto dwadzesce miliónów złotëch. Chòc Meta ùsłëcha nowégò prawa, ji przedstôwcë gôdają ò tim, że rozrzeszenié sprawë bezpiekù młodëch w Internece na taczi ôrt mòże przëniesc wicy szkòdë jak zwëskù. Ni mającë przistãpù do wiôldżich platfòrmów, nôscelôtkòwie bãdą próbòwelë z mniészima i mni regùlowónyma, jaczé równak nie òstałë òbjimniãté zôkazã, bò bédëją barżi priwatny ôrt kòmùnikacje. Meta bédowała, żebë miast tegò nałożëc wëmôgania werifikacje wiekù na krómë z mòbilnyma aplikacjama, a nié na apartné platfòrmë. Młodi miéwcë kòntów dostelë przódë pòwiadomienié ò zbliżającym sã terminie zôkazu, a téż òpcjã zapisaniô swòjich pòstów, òdjimków, nagraniów i priwatnëch wiadłów, a tej scygnieniô jich na swòje ùrządzenia. Ti, jaczi bëlë falszëwie òbtaksowóny na mni jak szestnôsce lat, mòglë dokazac swòjégò wiekù na spòdlim ùznôwónëch ùrzãdowò métlów werifikacje.

H.S.Sz.

Załączniki