Reklama

Pierszô premiérka w historie Japònie

Klëka

22/10/2025 12:56

Sanae Takaichi. Aùtór: 内閣広報室｜Cabinet Public Affairs Office; zdrzódło: https://pl.wikipedia.org/wiki/Sanae_Takaichi#/media/Plik:Sanae_Takaichi_October_2025_(3x4_cropped).jpg

Sanae Takaichi je òd trzëdzescë dwùch lat w pòlitice i dała sã pòznac jakno przedstôwcka kònserwatiwny i nôrodny zgrôwë bënë Liberalno-Demòkraticzny Partie.

We wtórk dwadzestégò pierszégò rujana niższô jizba japòńsczégò parlamentu, Jizba Reprezentantów, wëbrała na szefa rządu szescdzesątsztërëlatną Sanae Takaichi, a wëższô Jizba Radzczich ji wëbiér zacwierdzëła. Przédniczka Liberalno-Demòkraticzny partie bãdze pierszą białką na tim stanowiszczu. Zastąpiła Shigeru Ishibã, jaczi miesąc nazôd pòdôł sã do dimisje. Bëła przëstojniczką i blëską wespółrobòtnicą zasłużonégò premiérë Shinzo Abégò, w jaczégò rządze bëła ministrą bënowëch sprôw i kòmùnikacje. Przëznôwô swòje wiôldżé ùwôżanié za Margaret Thatcher, a za przédné céle swòji pòliticzi wëznaczëła bùdacjã mòcny a bògati Japònie z wësoczima pùblicznyma wëdôwkama i mònetarnégò pòdskacënkù. Je znónô jakno kònserwatiwnô pòliticzka ò nacjonalisticznym céchù. Do pòliticzi weszła w tësąc dzewiãcset dzewiãcdzesątim trzecym rokù, a w parlamence je ju dzesątą kadencjã.

H.S.Sz.