Reklama

Pierszô takô mòdlëtwa òd wnet piãcset lat

Klëka

24/10/2025 12:28

Òb czas wizytë króla Wiôldżi Britanie w Watikanie òkróm zwëczajnëch pòtkaniów doszło do pòspólny mòdlëtwë z papieżã i przëznaniô królowi honorowégò titla.

Britijsczi król Karól i królewô Kamila we czwiôrtk dwadzestégò trzecégò rujana pòtkelë sã z papieżã Léònã we Watikanie. Je to òficjalnô wizyta z leżnoscë fejrowónégò w Katolëcczim Kòscele Swiãtégò Rokù. Britijskô królewskô pôra planowała jã jesz za pòntifikatu Francëszka, ale bëła tedë òdłożonô z pòzdrzatkù na jegò lëché zdrowié – zetkanié bëło priwatné, w Dodomù Swiãti Martë, na dwa tidzenie przed smiercą papieża. Czwiôrtkòwé òdwiôdënë zaczãłë sã òd pòtkaniô z papieżã w biblotece Apòsztolsczégò Pałacu. Pòtemù król Karól zetkôł sã z watikańsczim sekretérą stanu kardinałã Pietrã Parolinã, a królewô Kamila zwiedzëła Paùlińską Kaplëcã. W pôłnié w Sykstińsczi Kaplëcë bëła ekùmenicznô mòdlëtwa w intencje òbarnë nôtërnégò strzodowiszcza, w fòrmie szlachùjący za brewiarzową sekstą. Mòdlëtwë pò łacëznie i pò anielskù prowadzëlë papiéż Léón i anglikańsczi arcëbiskùp Yorkù Stephen Cottrell, a spiéwałë chórë papiesczi ë królewsczi. Bëła to pierszô òd czasów refòrmacje pòspólnô mòdlëtwa britijsczégò panownika, bãdącégò głową Kòscoła Anglie, z papieżã. Pò mòdlëtwie królewskô pôra pòszła do Bazyliczi swiãtégò Paùela za Mùrama, jaczi protektorama przed refòrmacją bëlë anielsczi królowie. Tam król Karól przëjął titel Królewsczégò Kònfratra, na merk szacënkù i ùznaniô dlô jego ekùmeniczny starë ze starnë papieża.

H.S.Sz.