Reklama

Pierszô takô rozegra òd òsmë lat

Klëka

25/05/2026 16:36

Zdrzódło: https://en.wikipedia.org/wiki/Suwon_FC#/media/File:Suwon_FC_2016.svg

Karno z Nordowi Kòreji grało w fùsbalã ù pôłniowëch sąsadów. Wënik meczu nikògò nie zaskòknął.

We strzodã dwadzestégò maja doszło do òsoblëwi rozegrë w nogòwą balã białków. W gardze Suwòn w Pôłniowi Kòreje stanãłë procëm sobie pôłniowòkòrejańsczé karno Suwon FC i nordowòkòrejańsczi Naegohyang. To pierszi rôz òd dwa tësące òsmënôstégò rokù, jak jaczilebądz spòrtówcë z Nordowi Kòreji wëstãpòwelë ù pôłniowëch sąsadów. Przez sztrid midzë dwùma państwama reprezentacje ùnikałë rozegrów jedny ù drëdżich, nawet w przëtrôfkù taczich wëdarzeniów jak azjatickô Liga Méstrów Białków. Terô równak do zetkaniô ùdało sã doprowadzëc dzãka wespółrobòce pôłniowòkòrejańsczégò Ministerstwa Sparłãczeniô z bùtenrządowima òrganizacjama. Ne zażorgałë téż ò to, żebë balôrczi z Nordë miałë òb czas rozegrë doping, bò niżódny jich krajewi kibice przëjachac do wrodżégò kraju doch ni mòglë. Naegohyang dobéł dwa do jednégò. To òbzérników azjaticczi fùsbalë białków nie zadzëwòwało, bò tak lokalné karna jak i nôrodnô reprezentacjô Nordowi Kòreji wiedno miałë dobré òsëdżi w tim spòrce. Wedle rankingów Nordowô Kòreja je w Azje drëgô pò Japònie. Prawie z Japòńsczim karnã Naegohyang zmierził sã w sobòtã dwadzestégò trzecégò maja. Kòrejczi dobëłë nad Tokyo Verdy Beleza jeden do nula i òstałë mésterkama Azje. Przeszłë pò sztadionie w Suwònie z faną Nordowi Kòreje – zwëczajno zakazéwô tegò prawò jich sąsadów, ale za wëjątkã spòrtowëch rozegrów.

H.S.Sz.

Źródło i opracowanie własne