Reklama

Pierszô zagrańcznô réza papieża Léòna

Klëka

28/11/2025 16:29

Léón XIX; aùtór: Lula Oficial - https://www.flickr.com/photos/157736962@N05/54851452841/; zdrzódło: https://pl.wikipedia.org/wiki/Leon_XIV#/media/Plik:Leo_XIV_(13_October_2025).jpg

Pielgrzimkã do Tërecczi w roczëznã Nicejsczégò Sobòru miôł ju ùdbóné ùmarłi latos w jastrowi pòniedzôłk papiéż Francëszk.

We czwiôrtk dwadzestégò sódmégò smùtana zaczãła sã pierszô zagrańcznô réza papieża Léòna. Wëbrónô na niã òstała Tëreckô. Pielgrzimka dérëje w tësąc sétmësetną roczëznã Nicejsczégò Sobòru, na jaczi pierszi rôz za dogmat bëła ùznónô bòskòsc Jezësa Christësa jakno Bòżégò Sëna, a Jastrë stałë sã państwòwim swiãtã w Rzimsczim Césarstwie. Sobór radzył w Niceji, dzysdniowim Iznikù w Tërecce. Papiéż Léón równak zaczął swòje òdwiôdënë òd tërecczi stolëcë Ankarë, gdze pò dzesąti reno môlowégò czasu wëlądowôł jegò fliger. Pò zetkanim z ministrã kùlturë i turisticzi Mehmetã Nurim Ersoyã pòjachôł do grobnicë Mustafë Kemala Atatürka, zwónégò òjcã mòdernégò tërecczégò nôrodu, gdze złożił wińc i wpisôł sã do pamiątkòwi knédżi. Pò pôłnim pòtkôł sã priwatno z prezydentã Recepã Tayinã Erdoğanã w jegò pałacu, a tej pòjachôł do Nôrodny Bibloteczi, gdze dôł przemòwã ò wôdze dialogù i bùdowaniô mòstów, w narzeszenim do znaczënkù stôrożëtny Anatolie dlô zôczątków chrzescëjaństwa i rolë chrzescëjón w bùdowanim nowòtny tërecczi juwernotë. Dali biskùp Rzimù zetkôł sã z przédnikã ùrzãdu do sprôw religie Safim Arpagùşã, òdwiedzył Apòsztolską Nuncjaturã w Ankarze i wieczór wëlecôł fligrã do Sztambùłu. W piątk papiéż bãdze w Iznikù gdze weznie ùdzél w ekùmeniczny mòdlëtwie. Z Tërecczi w niedzelã trzëdzestégò smùtana pòlecy do Libie, a tam òstónie do drëdżégò gòdnika.

H.S.Sz.