Reklama

Pilocë robilë sobie òdjimczi òb czas lecbë

Klëka

25/04/2026 12:37

Pòzdrzatkòwi òdjimk. Òdj. Staff Sgt. Sean Carnes - US Air Force https://www.af.mil/News/Photos/igphoto/2002572646/; zdrzódło: https://en.wikipedia.org/wiki/McDonnell_Douglas_F-15E_Strike_Eagle#/media/File:F-15E_takes_on_fuel_from_KC-10.jpg

Ùznónémù za winnégò kòlizje ùdało sã zmniészëc sztrôfã ò dzewiãcdzesąt procent. Przekònôł kòmisjã, że wiele pilotów robi tak, jak òn òb czas zdarzeniô.

Kòrejańskô Radzëzna Aùditu i Kòntrolë òpùblikòwała rapòrt ze zderzeniô dwùch fligrów F-15K w gòdnikù dwa tësące dwadzestégò pierszégò rokù òb czas treningòwi lecbë. Wëchôdô z niegò, że pilocë robilë jeden drëdżémù òdjimczi ë nagriwelë filmë. Robilë to òb czas niebezpiecznëch manewrów. Dlô jednégò z nich miała to bëc slédnô lecba w kariérze i dlôte chcôł jã ùpamiãtnic. Doprowadzëło to do zderzeniô skrzidłã jednégò fligra ò ògònowi statecznik drëdżégò. Nicht nie béł reniony ani nie zdżinął, ale maszinë bëłë mòckò ùszkòdzoné. Pilot, jaczémù ùznelë winã za wëpôdk, dostôł sztrôfã òsmëset òsmëdzesąt miliónów wònów, co w przerechòwanim je kòl dwa miliónë sto tësący złotëch. Złożił apelacjã òd wërokù. Gôdôł, że w praktice w kòrejańsczi latawiznie je przëzwòlenié na robienié òdjimków i nagriwanié filmów przez pilotów i chòc przëznôwô sã do felë, nié mòże bëc jaż tak òstro òbsądzony. Rewizjowô kòmisjô przëjimnãła apelacjã i zmniészëła mù sztrôfã ò dzewiãcdzesąt procent. Kòrejańskô latawizna wëdała òswiôdczenié, w jaczim òficjalno przeprosëła za sytuacjã i zagwësniła, że regle bezpiekù bãdą zaòstrzoné, żebë taczé zdarzenia sã nie pòwtôrzałë.

H.S.Sz.

Załączniki