Reklama

Piãtnôscelaté służbë Przédnégò Łapimësza

Klëka

16/02/2026 11:00

Òdj. https://assets.digital.cabinet-office.gov.uk/government/assets/history/buildings/larry-the-cat-a47549e08bdbc6cd0e3e042eea943f65b7a4590d95642586e51acb44bb2dcea2.jpg

Larry służił za szesc britijsczich premiérów jakno symból stójnotë nimò nieùbëtkù w krajewi pòlitice.

W niedzelã piãtnôstégò gromicznika minãło piãtnôsce lat, òd czedë na Downing Street w Londinie kòl rezydencje i biórów premiérë Wiôldżi Britanie zamieszkôł kòt Larry. Sprowadzył gò ze schróniszcza Battersea w dwa tësące jednôstim rokù tamtoczasny premiéra David Cameron. Òd tedë pùjk òficjalno dostôł stanowiszcze Przédnégò Łapimësza w służbie Sekretariatu Gabinetu. Ju przódë kòtë robiłë na Downing Street, a title wëmiszlałë jima media, le Larry je pierszim, jaczégò stanowiszcze i òbrzészczi są pòcwierdzoné przez britijsczi rząd. Na rządowi starnie ò sedzbie premiérë mòże przeczëtac, że „Larry spãdzywô dni na witanim gòscy doma, inspekcjach zabezpieczeniów a téż sprôwdzanim zabëtkòwëch meblów, jeżlë jidze ò jich spòsobnosc do drzémaniô. Jegò codniowé òbrzészczi òbjimają téż rozwôżanié nad rozrzeszenim jiwru mëszi òkùpacje chëczë. Larry gôdô, że to je dali na etapie takticznégò planowaniégò”. Przédny Łapimësz służił za szesc premiérów. Mòże bëc òsmënôsce abò dzewiãtnôsce lat stôri. Widzôł sã z wiele swiatowima wódcama. Nié baro lubił chłopów, chòc ùwidzôł mù sã Barack Òbama. Przez sztërë lata òbrzészk dozéraniô rządowi gasë wespółdzelił z przeszłim na emeriturã w dwa tësące dwadzestim rokù kòtã Palmerstonã, jaczi mieszkôł naprocëm w Biórze Bùtnowëch Sprôw. Jich relacje czãsto biwałë napiãté.

H.S.Sz.

Źródło i opracowanie własne