Pòlicjô pitô Gduńszczanów ò darënczi sprzed szesc lat

Chto dostôł òb czas kòrónawirusa larwë i ksążczi òd Mùzeùm Drëdżi Swiatowi Wòjnë, miôłbë sprawdzëc mailową kastã. Jinaczi pòlicjò mòże gò wezwac na kòmendã jakno swiôdka.

Gduńskô pòlicjô rozséłô pò lëdzach mailowé wiadła do lëdzy, jaczi brelë ùdzél w akcje Mùzeùm Drëdżi Swiatowi Wòjnë „Larwa-Ksążka” w dwa tësące dwadzestim rokù. Béł to cząd pandemie, a mùzeùm bëło zamkłé. Bédowało równak mieszkańcóm Gduńska wësłanié zestôwkù òchrónnëch larwów i historicznëch pùblikacjów wëdónëch przez mùzeùm. W ti akcje wzãło ùdzél sétmë tësący òsmëset trzëdzescë sztërzech lëdzy. Pòlicjô pitô jich w mailach, czë westrzód dostónëch tedë darënków béł katalog głównégò wëstôwkù. Chto nie òdpòwié na pitanié, mòże bëc wezwóny na kòmendã jakno swiôdk. Takno pòlicjô chce sã doznac, co sã stało z felëjącyma wnet òsmë tësącama egzemplarzów katalogù, jaczé zniknãłë z magazynów mùzeùm, czej jegò czerownikã béł terny prezydent Pòlsczi Karól Nawrocczi. Za jegò czerownictwa òkòma zamkłoscë głównégò wëstôwkù bëłë niemôłé sztridë, bò jegò elementë bëłë zmieniwóné tak, żebë òdéńc òd pierwòszny ùdbë pòkôzaniô wòjnë jakno pòwszechnégò doswiôdczeniô lëdzy ë nieskùpiwaniô sã na pòlsczi martirologie. Midzë mùzeùm a aùtorama wëstôwkù prowadzony béł téż sądowi proces. W dwa tësące dwadzestim czwiôrtim môl Nawrocczégò przejimnãlë dôwny czerownicë Rafôł Wnëk i Janusz Marszalc i zmerkelë felënk stôrëch katalogów w składach. To dało pòdezdrzenié, że zarządzëna mùzeùm za Nawrocczégò je znikwiła abò schòwała. Grégór Berendt, jaczi piérwi béł zastãpnikã Nawrocczégò za jegò czerownictwa, a pòtemù sóm czerowôł mùzeùm do pòwrotu Wnëka i Marszalca, gôdô, że katalodżi òstałë rozdóné mieszkańcóm Gduńska òb czas akcje „Larwa–Ksążka” i nie bëło mòwë ò jaczim célowim zacéranim szlachów pò òriginalnym sztôłce wëstôwkù. Wszëtczé felëjącé katalodżi są wôrt wicy jak dwasta tësący złotëch. Dlôte prokùratura prowadzy przërëchtowania do zajãcô sã sprawą. Maile do Gduńszczón mają pòmòc sprawdzëc, czë Berendt rzecze prôwdã. Òbwinów jesz nikòmù nie pòstawilë.

H.S.Sz.